Footer

Pagtaengan, pagadalan, natakawan

SANTIAGO, Ilocos Sur – Napan la immisbo apagbiit, idi nagsubli, awanen ti selponna, laptop ken kuartana a nakaparabaw iti lamisaan iti uneg ti kuartoda.

Idi agarup 4:30 ti malem ti Marso 3, personal nga inreport ni Michael Vez y Pacquing, 31, mannalon, ken residente iti Barangay Bulbulala, ditoy nga ili, a natakawan ti pagtaengan ti ipagna a ni Lavinia Vez y Villarde, 30, naasawaan, maestra, a masarakan met laeng iti nadakamat a barangay.

Segun ken ni Vez, idi agarup 3:00 ti agsapa ti Marso 3, nakariing ni Vez gapu ta makaisbo ngem sakbay a napan iti pagisbuan, tineksanna pay nga immuna ni lakayna babaen ti selponna a Samsung.

Imparabaw met laeng ni Vez ti selpon iti lamisaan iti abay ti 1 Laptop (Asus) ken ti pouch a naglaon iti P6,500.00 sa napan immisbo.

Idi nagsubli ni Vez iti kuartoda, nakigtot laengen ta nakalukat metten ti sliding window ken awanen ti Samsung a selpon, 1 Laptop (Asus) ken P6,500.00 a kuartana a naikabil iti pouch.

Iti pannakaisurat daytoy, di pay nabigbig ti nangsikuat iti selpon, laptop ken kuarta ni Vez.

Immun-una ngem daytoy, idi agsapa ti Marso 1, inreport ni Magdalena Lazo y Tugade, 50, naasawaan, Principal III ti Magsingal South Central School ken residente iti Panay Sur, a natakawan ti pagadalanna, partikular ti opisinana a masuspetsa a naiwayat idi rabii ti Pebrero 29.

Kinuna ni Ronald Viloria y Unciano, dianitor ti nasao a pagadalan, nga idi sumangpet iti pagadalan iti agarup 7:20 iti dayta nga agsapa, nakitana a nakalukat ti main door ti opi-sina ti prinsipal ken awanen ti kandadona.

Segun ken ni Viloria, inkandadona ti ridaw ti opisina ti prinsipal sakbay a nagawid iti alas 5:00 ti malem ti Pebrero 29.

Iti panagimbestiga dagiti polis, natakuatanda a mapukpukaw ti maysa a Lenovo laptop nga agbalor iti P30,000.00 a naiparabaw iti lamisaan iti abay ti tugaw ti prinsipal a masuspetsa nga intaray ti di nabigbig a mannanakaw.

Saan a nagargaraw ti 10 a computer sets agraman dagiti projector ket nupay porsado a naluktan babaen ti pannakadadael dagiti drawer ti lamisaan dagiti mangisursuro, awan naireport a napukaw.

Sumagmamano a tubo ti nadiskubre iti asideg ti main door ket masuspetsa a dagitoy ti inaramat ti mannibrong a nangdadael kadagiti kandado.

Agtultuloy ti panagimbestiga dagiti polis mainaig iti pannakatakaw ti pagadalan.#

Comments are closed.