Footer

2 natiliw bayat ti pot session

BANTAY, Ilocos Sur – Dua a durugista ti natiliw bayat ti pot session iti uneg ti maysa a paupaan a kuarto sadiay Zone 1, ditoy nga ili idi sardam ti Marso 9.

Innaganan dagiti polis dagiti natiliw a da Ma. Lalaine Miranda y Diaz, 35, separada, agtitienda, ken natibo ti San Fernando, Pampanga, ken ni Orlando Tacardon y Ribunal, 37, naasawaan, drayber, taga-Barangay Bayubay Sur, San Vicente, Ilocos Sur, ngem agiggian iti Barangay An-annam, Bantay, Ilocos Sur.

Natiliw dagiti suspek iti akto a madama ti pot sessionda iti uneg ti up-upaan ni Miranda a kuarto sadiay Zone 1, ditoy nga ili idi sardam ti nadakamat a petsa babaen ti operasion nga inwayat dagiti operatiba ti Bantay Police Station kalpasan a nakaawatda iti impormasion manipud iti maysa a di nainaganan a kameng ti Barangay Intelligence Network ti nadakamat a barangay.

Idi makasangpet dagiti polis iti balay a pagkaseraan a kukua ni Tina Pacpaco, pinastrek ida ti akinkukua sana impatuldo ti kuarto a pakaar-aramidan ti pot session.

Nakakumpiska dagiti operatiba iti ikut dagiti suspek iti maysa a bassit a plastic heat sachet a naglaon iti mapapati a shabu; 2 a nakuppil a lighter, 9 a narolio a nakuppil nga aluminum foil a mapapati a nagkarga iti shabu residue; maysa a getteng; tudok a naaramat para iti panagipakete iti shabu; maysa nga straw a naaramat nga improvised totter; 2 a selpon; ken maysa tab a mapapati a maar-aramat para iti transaksion.

Sinaksian dagiti barangay officials, pannakabagi ti Department of Justice ken media ti pannakainbentario dagiti nakumpiska kadagiti suspek.

Kalpasan ti medico legal examination dagiti suspek iti Ilocos Sur Provincial Hospital, naipanda iti police station para iti umisu a dokumentasion idinto a naipan dagiti nakumpiska para iti pannakaamirisda iti Crime Laboratory Office a nakabase iti Ilocos Sur Police Provincial Office, Bulag, Bantay, Ilocos Sur.#

Comments are closed.