Footer

BANNER: P11-B bingay dagiti LGUs iti excise tax ti tabako, ruk-atan ti DBM

MANILA – Impakaammo ti Department of Budget and Management kadagiti lokal a gobierno a ruk-atanna iti mabiit ti P11 billion kas bingayda manipud iti excise tax ti tabako.

Kinuna ni Budget Secretary Florencio Abad a dakkel a katulongan dagiti LGUs dagitoy a pundo nangruna dagiti nababbaba ti pamastrekanda iti makatawen a mangiyimplementar kadagiti proyektoda tapno ad-adda a mapadakkel dagiti mannalon ti tabako ti produksionda ken pamastrekanda.

Rugian a ruk-atan ti DBM dagiti pundo kadagiti agparpartuat iti tabako nga LGUs inton umay a lawas.

Innayon ni Abad nga iti pannakaruk-at ti bingay manipud iti tobacco excise tax, mapapigsa dagiti LGUs a padur-asen ti kapasidadda a mangipaay kadagiti basic services kadagiti komunidad, nga isu ti napateg para iti redistribusion ken addaan kaipapanan a debolusion a puntiria ti nasional a gobierno.

Kadagiti agparpartuat iti tabako, ti Ilocos Sur ti kadakkelan iti bingay iti excise tax agsipud ta daytoy a probinsia ti kaadduan iti produksion.

Kadakkelan ti awaten a bingay ti Candon City, Ilocos Sur nga agdagup iti P356.9 million; Batac City, Ilocos Norte nga agdagup iti P183.1 million ken Balaoan, La Union nga agdagup iti P320.4 million.

Karaman kadagiti LGU a dadakkel ti awatenda a bingay manipud iti excise tax ti tabako ti Cabugao (P331.3 million); Narvacan (P276.9 million); Sta. Cruz, (P264.5 million); San Juan (P239.7 million); Santiago (P232.4 million); Sinait (P196.2 million) ken Magsingal (P183.1 million).
Kas intuding ti RA 7171 a pinutar ni dati a Gov. Luis Singson idi isu ti diputado iti umuna a distrito ti Ilocos Sur, umawat dagiti tobacco-producing provinces iti 15 a porsiento manipud iti excise tax ti tabako.
Manipud iti daytoy a buis, tallupulo porsiento ti bingay ti probinsia, 40 porsiento ti bingay dagiti munisipalidad ken component cities ken 30 porsiento ti mapan iti congressional district.

Iti met babaen ti RA 8240, adda met bingay dagiti LGUs nga agmulmula iti burley ken native a tabako iti 15 porsiento manipud iti excise tax ket 10 porsiento ti mapan iti benepisario a probinsia ken 90 porsiento kadagiti component cities ken munisipalidad kas maibatay iti volume ti produksion ti tabako.

Dagiti sumaganad dagiti LGU a kadakkelan iti bingay manipud iti burley ken native a tabako: Roxas, Isabela, P30.8 million; San Jose, Occidental Mindoro, P30.8 million; Quirino, Isabela, P29.7 million; Aurora, Isabela, P25 million; Narvacan, Ilocos Sur, P18.6 million; Ilagan City, Isabela, P16.9 million; Tumauini, Isabela, P16.5 million; San Fabian, Pangasinan, P15.1 million; Mallig, Isabela, P15 million; ken Amulong, Cagayan, P14.8 million.#

Comments are closed.