Footer

EDITORIAL: Ti Bentahe ni Pacquiao no makirupak iti ring

Segun iti Commission on Elections saanna a mapasardeng ti pannakiboksing ni Diputado Manny Pacquiao ken ni Timothy Bradley inton abril 9 sadiay La Vegas.

No patien ti Comelec, addan iti labes ti hurisdiksionna daytoy a pannakirupak ni Pacquiao iti ring iti baet nga adda komento da Party List Representative Walden Bello ken dati a Senador Saguisag nga itantan ni Pacquiao ti pannakirupakna ken ni Bradley agsipud ta maited kenkuana ti atiddog a media mileage iti nasao a boksing ket mailabsing daytoy iti paglintegan ti eleksion kas intuding ti Comelec.

Ala, no saan a kabaelan ti Comelec a lapdan ti panagboksing da Paquiao ken Bradley, saantayo a supiaten dayta agsipud ta ganggannaet dagiti promoter ti nasao a paboksing ket tapno agballigi daytoy a promosion, kasapulan dagiti rakurak, padamag, photo sessions, ken adda latta coverage ti radio ken telebision babaen ti pay per view ken kadagiti warnakan. Dakkel a dayaw ti pannakaiwaragawag ti nagan ti pagilian ken ti pannakaikanta ti nasional a kanta ti pagilian sakbay ti panangrugi iti boksing.

No patien dagiti apisionado ken uray dagiti agtuturay ti pagilian, dakkel a dayaw ti pagilian tunggal makirupak ni Pacquiao iti ring agsipud ta malaksid a maiwaragawag ti nagan ti pagilian ken makanta ti national anthem ti pagilian sakbay ti panangrugi ti boksing, nagbalinen ni Pacquiao nga idolo dagiti kailian nangruna dagiti agtarigagay a sumurot iti desdesna a boksingero. Nagbalin ni Pacquiao nga imahe ni marigrigat nga immalut-ot iti kuko ti kinapanglaw babaen ti nasged a tarigagay, arapaap, determinasion ken ambision.

Ngem iti daytoy a gundaway, maysa a kandidato a para senador ni Pacquiao. Ken adda paglintegan a mangituding a patas tunggal kandidato iti mileage iti warnakan, telebision ken radio. Dayta ti gapuna a nag-on leave dagiti artista a kandidato iti programada ken soap opera a pagak-akemanda.

Akuen man ken saan ni Pacquiao, dakkel a bentahena daytoy a pannakiboksingna ken ni Timothy Bradley sakbay ti eleksion. Laonento dagiti pagiwarnak, telebision ken radio dagiti damag, ken no ania ditan a pakulo dagiti promoter tapno maawis dagiti apisionado iti boksing a mapan agbuya. Ket inton Abril 9, live a maipabuya ti rupakda iti telebision, round by round a maiwaragawag kadagiti radio, ken laonento dagiti pagiwarnak ti resulta ti panagboksingda ken ni Bradley. Agbalinto ti naganna a sabong ti dila dagiti kailianna, pagtutungtonganto dagiti mangid-idolo kenkuana ti siglatna iti ring, idaydayawdanto ti pingetna a mangdisiplina iti bagina tapno mapagtalinaedna ti pardas ken partakna iti uneg ti ring. Akuen man wenno saan ti kampo ni Pacquiao, agresulta dagitoy kadagiti butos a mangitag-ay iti kandidatura daytoy a boksingero.

Ngem kuna ketdin ti Comelec a kitaennanto pay no adda malabsing a paglintegan no ituloy ni Pacquiao ti pannakiboksingna ken ni Bradley.

Pasigda amin nga abogado a de kampanilia dagiti didiosen iti Comelec. Uray nakakidemda, ammoda nga adda linteg a malabsing iti pannakaboksing ni Pacquiao ken ni Bradley. Apay a dida ita makapagdesision?

Iti sabali a bangir, nagpardasda a nagdesision a saan a natural-born citizen ni Senadora Grace Poe ket diniskualipikada. Naimbag ta binalinsuek ti Korte Suprema ti desision dagiti mamasirib nga abogado ti Comelec ket pinaboranna ni Poe nga agtaray a para presidente.#

Comments are closed.