Footer

Hot meat, nagandat a maipuslit iti quarantine checkpoint

TAGUDIN, Ilocos Sur – Sangakarton a karne nga awanan umisu a dokumentona ti nagandat a maipuslit iti quarantine checkpoint sadiay Barangay Bio ditoy nga ili idi bigat ti Marso 8.

Iti kaudian a report manipud iti polis ditoy, naaresto ti drayber ti Isuzu Elf van a ni Orestes Bernabe Geronimo, 38, drayber, ken residente iti Pulungbulu, Angeles City, Pampanga, ken ti pahinantena a ni Noel De Jesus Lobo, 35, baro, ken residente iti No. 4, Princetone Street, Marisol, Angeles City ken nakumpiska dagiti karne a karga ti nasao a van idi awan ti maipakitada a dokumento ti pannakaibiahe ti sangakarton a karne.

Nupay kasta, nawayawayaan met laeng da Bernabe ken ni De Jesus kalpasan a nagbayadda iti multada a P5,000.00 gapu iti panaglabsingda iti Provincial Ordinance No. 15-06, series 2015.

Naisubli met laeng kada Bernabe ti luganda nga Isuzu Elf van ngem nakumpiska dagiti karne a karga ti van a nasukalan dagiti polis a saan a naglasat iti National Meat Inspection Service.

Saan a nailanad iti report ti nakaipanan ti nakumpiska a karne.

Kas maibatay iti report, idi agarup 4:10 ti bigat ti Marso 8, nakaawat dagiti polis ditoy iti tawag iti selpon manipud ken ni Martel Plana Quitoriano, Provincial Animal Quarantine Officer, Vigan City, a nangipakaammo kadakuada a naka-intercept dagiti guardia ti Tagudin Animal Quarantine checkpoint ti maysa nga Isuzu Elf van a nagkarga kadagiti karne nga awanan iti umisu a dokumento.

Dagus a nagturong dagiti polis-Tagudin iti quarantine checkpoint sadiay Barangay Bio, ket ditoy a nadatngandan ti van a di pinalubosan dagiti guardia nga agbiahe kalpasan a naduktalan nga adda kargana a sangakarton a karne nga awanan iti umisu a dokumento.

Segun ken ni Animal Quarantine Officer Geoie Danee Ledda y Escaniel, 24, awanan asawa, idi agarup 2:10 ti bigat ti Marso 8, napasardeng ti van a minaneho ni Bernabe iti sango ti quarantine checkpoint ngem impakita ni Bernabe ti permitna nga agbiahe manipud iti National Meat Inspection Service.

Ngem iti panangberipika dagiti guardia iti karga ti Elf, naduktalanda ti maysa a karton a nagkarga kadagiti karne ken saan a nairaman iti NMIS a maibiahe ket impakaammoda daytoy ken ni Animal Quarantine Supervisor Dr. Celso Gao-ay idinto nga inaresto ni Duty Animal Quarantine Police Officer 1 Narciso Bangaoil da Bernabe ken ti pahinantena.

Daytoy ti umuna a gundaway iti daytoy a tawen nga adda manen naireport a nagpanggep a mangilasat iti karne iti quarantine checkpoint ditoy nga ili.#

Comments are closed.