Footer

P33.00 kada kilo ti mani, napagtutulagan iti dialogo agmulmula iti mani, komersiante

 

STA. LUCIA, Ilocos Sur – Nagkaysa dagiti agmulmula iti mani ken negosiante nga aggatgatang iti daytoy a produkto a P33.00 kada kilo ti masurot a presio daytoy a produkto bayat ti naisayangkat a dialogo a naangay iti Barangay Conconig East ditoy nga ili idi Marso 6.

Timmabuno iti nasao a dialogo ti nasurok a 60 a lider dagiti agmulmula ti mani iti panangidaulo ti Sta. Lucia Peanut Growers Association, 10 a komersiante ken 3 a kameng ti sangguniang bayan ditoy nga ili a naisayangkat babaen ti pannakitinnulong ti Solidarity of Peasants against Exploitation (STOP Exploitation).

Immun-una ngem daytoy, indatag ti SLPGA babaen ti panangidaulo ni Barangay Captain Romeo Rabang ti P48.00 a presio ti mani kada kilo para iti saan a naukisan ken naata a mani.

Segun iti grupo, nainkalintegan ti P48.00 kada kilo a presio a kasukat iti gastos, rigat ken sakripisio dagiti agmulmula iti mani kas maibatay iti P783.00 a kasapulan ti maysa a pamilia ti mannalon nga addaan innem a miembro.

Ngem imbaskag dagiti komersiante a saanda a kabaelan ti nasao a presio gapu ta agdepende ti presio a paggatang dagiti pagibagbagsakanda iti daytoy a produkto sadiay Urdaneta City, Bulacan ken National Capital Region.

Kinuna pay dagiti komersiante a P29.00-P33.00 kada kilo ti paggatgatangda iti naata a mani.

Imbaba dagiti lider ti asosasion iti P35.00 kada kilo ti presio ngem saan a simmabat dagiti komersiante.

Idi agangay, nagsinnabat ti dua a partido iti P33.00 kada kilo ti presio ti saan a naukisan ken naata a mani.
Kas maibatay iti katulagan, susteneren dagiti negosiante ti napagkaykaysaan a presio ti mani kada kilo aniaman ti sasaaden ti produkto ken presio a danonen dagiti komersiante iti pagibagsakanda iti daytoy a produkto.

Kinuna ti maysa a kameng ti asosasion nga iti napalabas, imbaba dagiti negosiante ti presio ti mani agsipud iti rason a limmag-an ti mani wenno bigla a bimmaba ti presio iti pagibagsakanda iti Manila.

“Ti rigatna, isuda met laeng ti nagutanganmi iti inusarmi iti panagtalon isu a maipapatida diay kayatda,” innayon ti dina kayat agpabigbig a mannalon.

Kalaksidan iti presio, nagkaykaysa ti agsumbangir a partido a ti pagkiluan ti mannalon wenno iti barangay a naipa-calibrate iti lokal a gobierno ti maaramat a pagkilo kadagiti mailako a mani ken pannakaikkat ti resiko.

Segun iti maysa a mannalon, manipud iti gudua kilo agingga iti maysa a kilo ti maikkat a resiko tunggal 30 kilos a sako ti produkto.

Kanaig daytoy, impasigurado dagiti dimmar-ay a kameng ti Sangguniang Bayan a maiwayat ti calibration kadagiti nasao a pagkiluan ken pannakaipatungpal dagiti dadduma pay a nagtutulagan.

Insingasing pay dagiti konsehal ti pannakaisayangkat ti nayon a panagtutungtong tapno ad-adda a mapadur-as ti produkto a mani.

Idi Nobiembre 2015, dimmanon iti P40.00 kada kilo ti farmgate price ti naata ken saan a naukisan a mani ngem dagus a bimmaba. Idi timmapog ti Pebrero 2016, bimmaban ti presio ti mani kada kilo iti P20.00.

Kas maibasar iti rekord ti Philippine Statistics Authority manipud 2011 inggana 2015, agabereyds laeng iti P30.00/kilo ti farmgate price a panaggatang dagiti komersiante iti produkto ti mani manipud kadagiti mannalon iti Ilocos Sur. (Manipud iti report ti Stop-Ex)

Comments are closed.