Footer

Motorista, naitapuak iti rangkis, DOA iti ospital

SANTA, Ilocos Sur – Tallo ti natay iti nagsisina nga aksidente idi Marso 16 ken 17 a pakaibilangan ti maysa a motorista a naitapuak iti rangkis iti Sitio Pideg, Santa, Ilocos Sur.

Iti aksidente a napasamak idi Marso 16 sadiay Barangay Bahet, San Ildefonso, Ilocos Sur, nainaganan ti biktima a ni Gerald Banez y Cabanting, 27, awanan  asawa, mekaniko, ken natibo iti Pilar, Abra ngem agnanaed iti Barangay Buquig, Bantay, Ilocos Sur.

Segun iti report, napakaskas ti Rusi Jumper a motorsiklo ni Banez gapuna a nadungparna ti Yamaha RS100 tricycle a minaneho ni Renato Tadios y Tabangin, 49, naasawaan, ken residente iti Barangay Nambaran, Sto. Domingo, Ilocos Sur.

Iti panagimbestiga dagiti polis,  mapapati a nakainom ni Banez ket napataray unay bayat ti panagpaamiananna a direksion ket nasapgidna ti  makannigid a footrest ken side mirror ti traysikel a puon ti pannakapukawna iti kontrolna iti manibela a nakaigapuan ti pannakaikrasna.

Naitaray ni Banez iti Northside Doctors’ Hospital, Guimod, Bantay, Ilocos Sur ngem naideklara a natayen gapu kadagiti sinagrapna a dunor iti nadumaduma a paset ti bagina.

Naipaagas met ti makannigid a tangan ti saka ni Tadios ket naipaagas iti San Ildefonso Medical Unit.

Kabayatanna, saan pay a nabigbig ti lalaki a naitapuak iti rangkis iti pagpikoran a sakup ti Sitio Pideg, Barangay Magsaysay District, Santa, Ilocos Sur idi parbangon ti Marso 17.

Kuna ti report nga agpaabagatan ti nangisit a Mio Sporty motorcycle a minaneho ti biktima ket mapapati a napukawna ti kontrolna iti manibela iti kurba a paset ti highway a puon ti pannakadungparna iti kongkreto a bangen ti akinlaud a paset ti kalsada a nakaigapu ti pannakaitapuak ti drayber iti nauneg a rangkis.

Naiyuli met laeng dagiti nagresponde a kameng ti BDRRMO ti Santa ti biktima sada intaray iti RHU ti ili ngem indeklara ti doktora a nangtaming kenkuana a dead on arrival.

Saan metten a naidanon a sibibiag ti lalaki a dinungpar ti maysa a bus iti national highway a sakup ti Barangay Mantanas, Sta. Cruz, Ilocos Sur idi parbangon ti Marso 17.

Dead on  arrival iti Sta. Lucia District Hospital ni Henry Balisacan, Jr. y Javillonar, 42, awanan  asawa ken residente iti Sto. Nino, Paranaque City.

Simmuko ni Gil Fagela y Guzman, 37, naasawaan, drayber ti Partas bus ken residente iti Barangay Taleb, Bantay, Ilocos Sur, iti Tagudin Muncipal police station sa naipaima iti Sta. Cruz police station.

Kas maibatay iti report, kinuna ni Fagela a dina nakita ti panagballasiw ni Balisacan gapu ta nakaaruat iti nangisit a lupot ken gapu ta makasisirap ti silaw dagiti lugan nga aggapu iti sabali a linia.#

 

Comments are closed.