Footer

BANNER: SITG Ubungen, nabuangay mainaig panagpabettak iti eksplosibo sadiay Candon City

CANDON CITY – Panangriribuk wenno pananggandat iti biag ti maysa a polis wenno dati a mayor ti  panggep ti pannakapabettak ti maysa nga eksplosibo sadiay Barangay Calaoa-an, Candon City idi parbangon ti Marso 19?

Iti naisayangkat a case conference iti Candon City Police Station babaen ti panag-preside ni Acting Ilocos Sur Police Director Senior Supt. Reynaldo Tamondong ken dinar-ayan ti DPDA, PIDMB, SOCI, EOD, PEMAC  PIB, ken RIU1, nabuangay ti Special Investigation Task Group (SITG) Ubungen para ti pannakaiwayat ti naun-uneg nga inbestigasion mainaig iti nasao a panagpabettak iti eksplosibo iti abaga ti national highway a sakup ti Barangay Calaoa-an, ditoy siudad idi agarup 4:15 ti agsapa ti nadakamat a petsa.

Sumagmamano nga anggulo a posible a motibo iti  panagpabettak ti rimmuar iti kumperensia: gandat ti perpetrator ti mangitukit iti alarma iti publiko bayat ti panagpiesta ti Candon City; ti ballaag ti Tuquero drug group a pannakapapatay dagiti kameng ti Candon City police station;  kasta met ti posible a pananggandat iti biag ni dati a Bangar, La Union Mayor George Pinzon nga immatendar iti Tobacco Festival ti Candon City.

Naipabaklay iti PIB ti pannakaiwayat ti balidasion  ken panagpalutpot no ania ti gapu ti kaadda ni POI Ubungen iti Candon City idi napasamak ti panagpabettak, kasta met a naipaima iti Intelligence section ti Candon police station ken ti ISPIB ti panagimbestiga no paset ti insidente ti taktikal nga opensiba ti New People’s Army tapno maipakitada ti kapasidadda nga agdawat iti revolutionary tax wenno ekstorsion mainaig iti masungad nga eleksion.

Kas maibatay iti inisial a panagimbestiga ti kapolisan, agdaldaliasat nga agpaabagatan ti nadakamat a highway ni PO1 Mark Joseph Ubungen y Abrazaldo, 27, awanan asawa, PNP member a nakadestino iti Bangar Municipal Police Station ken residente iti Barangay Poblacion, Bacnotan, La Union a nakalugan iti nangisit a Kawasaki Rouser nga awanan plakana idi kellaat a bimtak ti maysa nga eksplosibo iti akinlaud nga abaga ti highway partikular ti kongkreto a poste ti elektrisidad a nakaigapuan ti pannakadundunor ti nadumaduma a paset ti bagina.

Naitaray ni Ubungen iti Candon City Hospital para iti pannakataming dagiti sugatna.

Saan a naan-ano ni Mayor Pinzon a kadayta a kanito, nakalugan iti pribado a luganna a sumarsaruno ken ni Ubungen.

Naipan dagiti narekobre a nylon cord ken piesa dagiti babassit a plastik ken aluminum iti crime laboratory para iti pannakaamirisda.

Segun iti EOD, maysa nga improvised explosive device ti naaramat iti panagpabettak.

Idi met laeng Marso 19, nagturong dagiti kameng ti PIDMB nga indauluan ni Supt. Maximo A. Taclas iti Bangar Municipal Police Station tapno alaanda iti statement ni Ubungen ngem saan a naituloy gapu iti panagpapaimbag daytoy maigapu iti sugatna iti makannigid nga abagana.

Naiyeskediul ti panagpalawag ni Ubungen idi Marso 20  iti Candon City police station.

Iti pannakaisurat daytoy, saan  pay a naiparuar ti statement ni Ubungen.#

Comments are closed.