Footer

EDITORIAL: Pannakaamendar ti Money Laundering Act ken Bank Secrecy Law

PANAWENEN ti pannakaamendar dagiti linteg iti Pilipinas a Money Laundering Act ken Bank Secrecy Law tapno malapdan dagiti moderno a wagas ti panagtakaw wenno pannakamaneobra dagiti deposito, ken pannakaidalus dagiti kuarta a naala babaen iti illegal a wagas.  Iti panagmodernon ti panawen ken panagdur-as ti teknolohia, masapul a dagiti linteg ket mayanatup iti agdama a panawen. Umad-adun dagiti mapaspasamak a cyber theft pakaibilangan dagiti electronics financial transactions.

Naipakadawyanen nga iti panagtakawan kadagiti banko ket maisaysayangkat babaen ti panagholdap wenno puersado a wagas dagiti kriminal. Ngem iti pannakausaren ti computer iti moderno a banking system, nakapanunot dagiti nasirib a kriminal iti baro a wagas ti panagtakawda kadagiti banko babaen ti panangserrekda (hacking) kadagiti computer systems dagiti banko ken dadduma pay a financial institutions. Nakapanunotda pay kadagiti wagas a panangiyakar ken panangiruarda kadagiti matakawda a kuarta tapno malisianda ti linteg.

Nakaro a pannakaibabain ti Pilipinas iti imatang ti sangalubongan ti pannakaaramat ti sanga ti Rizal Commercial Banking Corporation sadiay Jupiter Street, Makati City iti pannakaidalus wenno pannakalaba (money laundering) ti US$ 81 million a natakaw babaen kadagiti computer hackers idi pay Pebrero 5, 2016. Daytoy a sanga ti banko ti nakaiyakaran ken nakairuaran ti $81 million a deposito ti Bank of Bangladesh (Central Bank) sadiay United States Federal Reserve Bank idiay New York, USA.

Maibasar iti pakauna nga imbestigasion ti Anti-Money Laundering Council ken Senate Blue Ribbon Commitee, naiyakar ti $81 million iti RCBC babaen ti panangiproseso a mismo ti branch manager a ni Maia Santos Dequito. Nabingbingay ti kantidad kadagiti uppat nga accounts a nalukatan ken naipanaganda kadagiti mapapati a parbo a nagan a Jessie Christopher Lagrosas ($30 million), Alfred Vergara ($19.999 million), Enrico Vasquez ($25 million) ken Michael Cruz ($5 million), sada naiyakar iti account ni William Go ti DBA Centurytex Trading, ken dadduma pay a kompania ti kasino. Nagpatulong ti Bank of Bangladesh iti Bangko Sentral ng Pilipinas tapno makamat ti napukaw a pondo.

Nangipilan ti AMLC iti kaso a money laundering kontra ken ni Dequito ken dagiti nainagan kadagiti uppat a bank accounts mainaig iti pannakairuar ti natakaw a kuarta. Nangiyetnag metten ti Court of Appeals iti freeze order kadagiti dadduma pay nga accounts a mapapati a paset ti natakaw nga $81 million.

Kadagiti pakauna nga imbestigasion ti Senate Blue Ribbon Commitee, maladladdit iti kaso ni Dequito iti pannakayakar ken pannakaiparuar iti RCBC ti natakaw a kuarta. Ngem patien dagiti senador a ti naballigi a money laundering ket saan nga isuna ti utek ken adda iti likudna dagiti nangato ken maimpluensia a tattao.

Rumrummuar kadagiti report a naballigi ti pannakaiyakar ken pannakairuar ti $81 million iti RCBC gapu kadagiti abut iti Bank Secrecy Law ken kinalukay ti Money Laundering Act. Panawen ngaruden a mapatibker dagitoy a linteg tapno nadaras a maduktalan dagiti mailemlemmeng a transaksion ken mairamanen a mausisa dagiti kompania ti sugal ken casino.  Nasken daytoy tapno mapasardengen iti Pilipinas ti pannakapadalus dagiti narugit a kuarta a naala iti illegal a wagas, saan laeng iti pannaka-hack dagiti banking systems, ngem uray pay dagiti naggapu kadagiti negosio ti illegal a droga ken sugal, human trafficking ken kurapsion.

Ngem suportaran ngata dagiti nangato nga opisial ti gobierno ti pannakaamendar dagitoy dua a linteg no isuda a mismo ket adda met ilemlemmengda a deposito kadagiti banko a nagtaud iti kurapsion ken dadduma pay nga illegal a wagas? (Eden A. Alviar)

Comments are closed.