Footer

Lunod iti Barukong

Sarita ni Monique E. T. Recaido

(Maudi a paset)

 

Impaigid ni PO2 Anicoche ti patrol car iti sanguanan ti Marian Hospital.

Simmabat dagiti attendant. Dinagdagusda nga impaidda ni Daniel iti stretcher. Sipapardasda nga inyuneg ti biktima iti OR.

Immawagak iti police station. Imbilinko ken ni SPO3 Castro ti panagturongna iti balay da Roberto De Vega sada awisen nga agpalawag iti police station.

“No agkedked, posasanyo!” imbilinko.

Tinaldiapak ni Lilibeth, ti nobia ni Daniel a nakadumog idinto a saklotna dagiti dakulapna.

Simmangpet ti on duty a doktor ket immuneg iti operating room. Naguraykami iti ruar.

Madamdama, rimmuar ti doktor. Dinagdagusko nga inasitgan.

“Kasano ti biktima, dok?” nakunak.

“Nalasatnan ti peggad,” nakuna ti doktor.

Naammuanmi idi agangay a narabaw ti sugatna iti makannigid nga abagana ken  awan ti nasalapon nga urat wenno bagis.

“Madadaanka nga agdarum maikontra ken ni Roberto De Vera iti daytoy nga inaramidna?” inamadko ken ni Lilibeth.

“Diak ammo, sir. Makulkolan ti panunotko…”

“Ala, agsublikaminto no bigat,” nakunak.

Limmugankami iti patrol car ket nagtaruskami iti presinto. Natiliwen ni Roberto. Inakona a binagkongna ni Daniel.

“Pinakaammuanyo dagiti dadakkelna?” dinamagko ken PO2 Anicoche.

“Wen, sarge,” insungbat ni PO2 Anicoche.

Nagturongak iti nakaipupokan ni Roberto. Nauyong ti rupana.

“Nadagsen ti kasom,” kinunak. “Apay nga inaramidmo?”

Kinuti laeng ni Roberto ti abagana.

“Dika kadi maasian kadagiti dadakkelmo? Ar-aramidenda amin a kabaelanda tapno maipaayandaka iti naraniag a masakbayan ngem sika met laeng ti mangrakrakrak.”

“Dimo dakamaten dagiti dadakkelko! Kagurak ida! Napatpateg ti pirak kadakuada ngem siak!” kellaat a gimluong ti timek ni Roberto De Vega.

INDURONKO ti ruangan ti sarming a nakaisuratan ti Office of the President. Sinabatnak ti lamiis.

“Di la mabalin a kasaritak ni Mr. De Vega?” kinunak iti napintas a receptionist.

Nagtelepono ti receptionist. Imbagana a mabalinkon ti sumrek iti opisina ni Mr. De Vega.

“Naidaw-aska man, Superintendent Castro?” nairut ti lamano ni Mr. De Vega. Pinagtugawnak. Binilinna ti sekretariana a mangiserrek iti kape.

“Nawaswas gayamen ti darum a maikontra ken ni Robert,” nakunak.

“Wen,” insungbatna. “Indiayaak ni Daniel iti beinte mil tapno saanen nga agtuloy nga agdarum.”

“Saan ngata a biddut ti ar-aramidenyo, Mr. De Vega?”

“Ania ti kayatmo a sawen,?” Napunas ti isem ni Mr. Sanchez.

“Agaramidto latta ni Robert iti maikaniwas. Makalubamto kadi pay no nadagsen unayen ti nagbasolanna?”

“Bugbugtong nga anakko. Aramidek amin a kabaelak tapno di mamulitan ti naganna.”

“Pinadasmo kadin nga inamiris no apay a kasdiay, Mr. De Vega?”

“Paset amin ti panagdakkelna. Napadasantayo met dayta nga uged, saan kadi?”

“Sabali ti kaso ni Robert, Mr. De Vega,” nakunak. “Kayatna a rakraken ti masakbayanna. Ammom kadi no apay?”

“Ituloymo.”

“Kagurgurana ti pagtaengan a napuotanna. Agpayso, aglaplapusanankayo iti material a banag. Itedyo amin a dawatenna. Ngem adda nalibtawanyo nga impaay kenkuana…. pammateg.”

Saan a nagtimek ni Mr. De Vega.

“Diak koma bumiang, Mr. De Vega, ngem kailalaak ni Robert. Mabalinyo pay laeng nga aturen ti biddutyo. Ita ta nasapa pay.”

KASANGAYKO. Nagpartiak iti kalding. Tallo kahon a serbesa ti inreserbak. Dagiti padak a polis ti sangailik.

Natugtog ti ridaw. Da Mr. De Vega ken Robert. Adda igpilda a bungon. Limmukmeg ni Robert. Naisemen, saan a kasla idi a nalidem ti rupana.

“Naragsak a kasangaymo, hepe,” inkablaawda. Inyawatda ti sagutda.

“Agyamanak,” inyisemko. “Sumrekkayo, a.”

Pinagtugawko ida. Inyam-ammok ni baketko. Binilinko ni Maring a mangiruar iti kilawen ken kaldereta. Nanglukatak iti uppat a serbesa.#

Comments are closed.