Footer

Nadumaduma a paltog, balbala, nasamsam iti search operation

BANTAY, Ilocos Sur – Nadumaduma a paltog ken balbala ti nakumpiska dagiti operatiba iti insayangkatda a nagsina a panagsukisok iti dua a pagtaengan ditoy nga ili idi malem ti Marso 20.

Iti report manipud iti Provincial Police Office, positibo ti resulta ti search warrants nga inyisio ni Judge Mario S. Domingo ti MCTC Magsingal-San Juan, Ilocos Sur a naggiddan nga inwayat dagiti nagtitipon nga elemento ti kapolisan ti Sinait ken PPSC, Ilocos Sur PPO iti balay ni Sherwin Ines y Impelido, 37, naasawaan, barangay tanod, ken residente iti Barangay Calingayan, ken ni Noel Ines y Davis, 33, awanan asawa, mannalon, ken residente iti Barangay Pacis, Sinait, Ilocos Sur idi agarup 3:30 ti malem ti nadakamat a petsa.

Nakakumpiska dagiti operatiba iti balay ni Sherwin Ines iti maysa a homemade shotgun (Open break); maysa a cal. 38 Armscor nga addaan SN 48886 ken pakakitaan iti tampering; maysa a homemade handgun; 2 rifle grenade  nga addaan marka a Baltrap 768-AVA-0055-RA ken Baltrap M76RG3-600-A92-06; 3 bala para shotgun; 6 bala para Cal. 38 ken maysa a black holster para Cal. 38.

Iti met balay ni Noel Ines, nakasamsam dagiti nagsukisok iti maysa a paltog nga addaan marka a Police Positive Cal .38 nga addaan serial number 54443; maysa a Cal .38 nga addaan marking a By Power Custom Indep; maysa nga Smith and Wesson, awanan serial number; maysa a  Cal .38 nga awanan marka ken serial number; maysa a homemade Cal .22 nga awanan magasin  (long rifle), marka ken serial number; 3 bala para Cal .38; ken 2 bala para  Super .38.

Sinaksian dagiti barangay officials ti panagsukisok dagiti polis.

Inaresto dagiti polis dagiti dua a suspek sada impan dagitoy agraman dagiti nakumpiska iti police station para iti umisu a disposision.

Kabayatanna, naipatuloden ti kaso a panaglabsing iti RA 9516 maikontra ken ni Jojo Tabudlo y Artillero iti opisina ti provincial prosecutor, Vigan City para iti umisu nga ebaluasion ken disposision.

Inaramat ni Tabudlo ti probiso ti Artikulo 125 ti Revised Penal Code ti kalinteganna a maipababaen iti preliminary investigation idi Marso 23 a pinirmaan ni Public Attorney II Jonathan E. Florentino.

Maipalagip a nakakumpiska dagiti polis babaen ti insayangkatda a panagsukisok  iti balay ni Tabudlo sadiay Barangay Puro, Magsingal, Ilocos Sur iti maysa a hand grenade idi agsapa ti Marso 22, 2016.#