Footer

Napaltogan a baket, bangkayen idi masarakan

SAN JUAN, Ilocos Sur – Saan pay nga ammo ti motibo iti pannakapapatay ti maysa a baket sadiay Barangay Caronoan ditoy nga ili a mapapati a naisayangkat idi sardam ti Marso 23.

Nadiskobre a daradara ti boksitna ken awanen ti biag ni Corazon Viloria y Retuta, 69, naasawaan, ken residente iti nadakamat a barangay idi agsapa ti Marso 24.

Segun kadagiti annak ti biktima a da Jerry ken Fernando, idi agarup 7:30 ti sardam ti Marso 23, nakangegda iti nagsasaruno a kanalbuong iti lauden a paset ti pugon ken  balay ni Jerry.

Bineripika ni Jerry ti lugar ngem awan ti nakitana a makapasuspetsa a napasamak.

Iti kabigatanna, idi agarup 6:00 ti agsapa ti Marso 24, natakuatan laengen ni Jerry ti inana a natayen ken daradara ti boksitna.

Iti panagpalutpot ti SOCO team iti crime scene, naammuan a dua ti sugat ti biktima iti boksitna.

Nakakolektada pay iti tallo a kapsula manipud iti cal. 56.

Maiyur-uray ti resulta ti autopsia iti bangkay.

Kabayatanna, panagsubang bayat ti drinking session ti ramut ti pammaltog a napasamak sadiay Barangay Sto. Tomas, Candon City idi rabii ti Marso 22.

Immuna a naitaray ni Alex Mangasar y Bisieg, 40, naasawaan, mannalon, residente iti Barangay Sto. Tomas, Candon City, iti Candon City Hospital sa naiyalis iti ITRMC, San Fernando City, La Union.

Naaresto met iti pagtaenganna ni Roger Mangay-ayam y Annaguey, 49, naasawaan, drayber, kalugaran met laeng ti biktima.

Kas maibatay iti report, naggiinom ti suspek, biktima ken sumagmamano a kakaduada iti balay ti maysa a Novie Annaguey y Cudiamat ket bayat ti drinking spree, nagsinnungbat ti biktima ken ti suspek.

Naggawid ti suspek ket kalpasan ti sumagmamano a minutos, nagsubli sana pinaputokan iti namitlo ti biktima a nakatamaan ti akinngato a makannawan a barukong ken makannawan a boksit daytoy.

Nakarekobre dagiti inbestigador iti crime scene iti maysa a calibre 45, tallo a kapsula manipud iti cal. 45, maysa nga awan naggianna a magasin para iti cal. 45.#