Footer

Palso a dokumento ti kaso, nagandat a maipalusot iti korte

VIGAN CITY – Iti daytoy a panawen a modernon ti teknolohia, pati desision ti hues, nadarasen a mapalsipika.

Ngem malas ni Carlota Cartaño Erum,  ta saan a nakalusot ti iggemna a palso a dokumento bayat ti pannakitransaksionna iti Regional Trial Court Branch 20, Vigan City idi aldaw ti Marso 23 ket nasaklangan iti kaso a panagpalsipika iti publiko a documento.

Mismo a ni Atty. Elizabeth Bringas ti Vigan City Prosecutor’s Office ti timmawag iti Vigan City police station ket inreportna a natiliwanda ni Cartaño, 39, naasawaan, mapapati a liaison officer ti opisina ti maysa a konsehal iti Manila City Hall, ken residente iti Block 36, Lot 34, Tumana Market, Phase 2, Area 2, Navotas City, nga agikut iti palsipikado a publiko a dokumento.

Iti inisial a panagimbestiga ti polis, nakitransaksion ni Cartaño iti Regional Trial Court Branch 20, Vigan City nga aramatna ti palsipikado a dokumento a nakaipalaonan ti Civil Case No. V-2043 mainaig iti declaration of nullity of marriage ti maysa a Jover T. Dela Merced a nagpetision kontra ken ni Ressielyn M. Giron-Dela Merced.

Segun iti report, nakalanad iti dokumento ti letterhead ti korte ngem palso ti nailanad nga opensa ken nagan ti branch clerk of court ken pirma iti ngatona. Kasta met a mapapati a palso ti desision a nakailanadan ti nagan ni Executive Judge Marita B. Balloguing ken napalsipika ti pirma iti ngatuen ti naganna.

Saan a nailanad iti report no agpayso a sibibiag ni Jover T. Dela Merced ken ti napetisionan a ni Ressielyn M. Giron-Dela Merced.#

Comments are closed.