Footer

Riri ti agkaarruba, nagramut iti leksio

MAGSINGAL, Ilocos Sur –   Mapapati a nasusungeg daytoy suspetsa iti leksio a dengdenggen ti biktima a maipatpatangatang ket imbilinna ti pannakaiddep ti radio ngem idi saan a naipangpangag, ditan ti nagramutan ti riri ken pananggandat ti suspek a mangtagbat iti biktima.

Nabigbig ti biktima a ni Robert Quitoriano y Bisquera, 46, naasawaan, mannalon, idinto a nainaganan ti suspek a ni Rommel Gonzales y Barsatan, 41, naasawaan, agpada a residente iti Barangay Bungro, ditoy nga ili.

Kas maibatay iti police journal, idi agarup 8:20 ti rabii ti Mierkoles Santo, agdengdengngeg ni Quitoriano iti leksio iti radio idi immasideg ni Gonzales sana imbilin ti pannakaiddep ti radio. Mapapati a nakainom iti arak ni Gonzales.

Idi saan nga intaltalek ni Quitoriano, narurod ni Gonzales ket naggawid. Idi nagsubli, nakaarmasen ti suspek iti bolo ket kellaatna a dinarup ti biktima ngem nakagammat daytoy iti pagtungo ket daytoy ti pinangsalaknibna iti bagina.

Idi tagbaten ni Gonzales ni Quitoriano, ginammatan ti biktima ti bolo ket nagludonda iti daga a nagresulta iti pannakadunor ti makannigid a middle finger ti suspek.

Naipan da Gonzales ken ni Quitoriano iti Magsingal District Hospital para iti pannakaagasda sa kalpasanna naipan ti suspek iti police station para iti umisu a disposision.

Impaima ni Pia Mae Gonzales y Oandasan, 15, anak ti suspek, ti bolo kadagiti nagresponde a polis.