Footer

San Vicente, Ilocos Sur, nalatak nga ili dagiti agkitikit iti rebulto

Salaysay ni Imelda C. Rivero

“Taeng dagiti agar-aramid iti dios,” daytoy ti pannakailadawan ti ili ti San Vicente, Ilocos Sur, segun iti gobierno ti munisipio nga idadauluan ni Mayor Jose Tabanda III.  Ti napalalo nga ayat dagiti Katoliko nga agindeg iti pammatida ti paratignay kadakuada a mangituloy iti inrugi dagidi papadi ken eskultor a Kastila – ti panagkitikit kadagiti rebulto.

Idi kanikatlo a tawen, tapno maisubli ti essem dagiti agindeg iti panagkitikit dagiti rebulto, nangesponsor ti munisipio iti maysa a panagsanay a naangay iti gymnasium ti ili babaen ti initiatibo ni  Bise Mayor Nancy Tabanda. Ti bise mayor ti mangidadaulo iti pannakaisubli ken pannakaidokumento daytoy importante a kultura ken tradision ti ili.

Balligi ti naisayangkat a panagsanay. Adu dagiti napan nagsanay, nangruna dagiti agessem iti panagkitikit. Nagbalin a maysa a sentro ti atension ti maysa a nataengan nga immatendar iti panagsanay. Ti naidumduma kenkuana ket uray agtawenen iti 75, saan a nagbain a nakipagsanay. Kinuna daytoy dina kayat a mainaganan a lakay a kayatna met ti agkitikit ti rebulto uray kadaytoy nga edadna.

Idi Abril 2015, nangesponsor manen ti munisipio iti maysa a salip iti panagkitikit iti rebulto ti patron a santo ti ili a ni San Vicente Ferrer.  Nangrugi ti pasalip idi Marso 30 ken nagpatingga idi Abril 28, ti kaaldawan ti piesta ti ili a maselselebraran iti kaudian a Martes ti Abril ti kada tawen. Segun kadagiti opisial ti ili, inrusatda ti pasalip tapno ad-adda manen a rubrobanna ti apuy ti essem dagiti eskultor ti ili tapno inayonda ti panagkitikit ti rebulto iti panagaramidda kadagiti kayo a muebles. Nalatak ti ili ti San Vicente a paggapgapuan dagiti nalagda ken nakitikitan a muebles, kas  iti tugaw, lamisaan wenno katre.

Naitandudo met ti One-Town-One-Product (OTOP), wenno kangrunaan a produkto ti ili nga  antigo a muebles a kayo babaen ti pasalip ti panagdisenio ken panagaramid ti muebles kadaytoy met laeng a bulan.  Bassit a lakasa a kasla antigo a paggianan ti alahas ti nangabak. Addaan kitikit ti maysa a kulaaw iti tuktokna ken addaan iti uppat a saka ti billit iti uppat a sulina iti baba. Naimuntar met ti kadaanan a tig-pipiso ken binting iti ngato a parte ti bakrangna.  Inaramid daytoy ni Francisco Reprima. Aglanglanga nga antigo a lakasa a nakutkot iti sabali a lugar.

Maikadua a nangabak ti inaramid ni Romano Reynante. Maysa daytoy a pagipatayan iti rebulto nga ikabil iti pader; addaan iti bulbulong nga agukrad agpangato kas man aglulualo wenno agdaydayaw iti Dios wenno ti rebulto nga ig-iggamanna.

Inaramid ni Rosendo Rojo ti maikatlo a nangabak – ngumisit a kuadro nga addaan sabsabong nga agkalatkat, sidudungngo a mangabrasa iti aniaman nga ikabil a nailadawan.  Kasla adda salamangkana daytoy  datdatlag a kuadro.

Dagiti dadduma pay a naisalip ket inaramid da Zalvar Reynante ken Larry Martin. Tugaw nga adda kitikitna a kasla naabel a kayo ti maysa, idinto a bassit a lakasa nga adda bulbulong ti kalubna ken dua a bakrang. Adda pay mini wenno bassit a lamisaan nga addaan sarming iti burdado a kuadro. Adda met sarming a naikuadro iti adda kitikitna a puso, napintaan iti puraw ken nalabaga.  Ti maudi ket kuadro nga adda sarmingna ken naidetalye ti naikitikit a sabong, ti pangitunda ti panagdur-as ti ili: TIGNAY San Vicente a ti kayatna a sawen ket Trabaho Igaed Gin-awa maited Nasalun-at A pagillian Yegna’t pagsayaatan.

Tapno maipokus met ti atension dagiti bisita bayat ti panagpiesta ti ili kadagiti muebles dagiti agindeg, adda pagtagilakuan iti sango ti munisipio agingga iti agtapus ti bulan ti Marso a nakailakuan dagiti nakitikitan a muebles. Mabalin pay dagiti bisita ti agorder iti muebles babaen iti telepono 722-8230.

Gapu ta adda met epekto ti panagawanen dagiti bakir ti pagilian iti industria ti muebles iti ili, agsapsapulen ken agus-usar dagiti kumikitikit kadagiti kayo a masatsat manipud kadaanan a pagtaengan no agpabaro dagiti bumalay.

Mangnamnama ti gobierno ti munisipio nga agtultuloy ti industria ti muebles ket sumayaat pay kadagiti sumaruno a tawen babaen ti suporta dagiti umili, pribado a tao ken grupo ken ahensia ti gobierno.#

 

 

Comments are closed.