Footer

Umuna nga Ilokano nga Obispo, Kandidato nga Agsanto

Salaysay ni Eden A. Alviar

NAIGIBUS idi Agosto 2, 2016 ti archdiocesan process ti panagbalin a santo daydi Obispo Alfredo Florentin Verzosa, ti umuna nga Ilokano a Katoliko nga Obispo babaen ti Misa sadiay St. Paul Cathedral, Vigan City. Maidatagton iti Congregation for the Causes of Beatification iti Vaticano dagiti dokumento a mangsuporta ti panagbalinna a santo.

Naideklaran ni Apo Verzosa a “Servant of God” kalpasan ti rugi ti proseso ti Cause for Beatification sadiay St. Paul Cathedral idi Enero 13, 2013 kabayatan ti Misa nga indauloan ni Arsobispo Ernesto A. Salgado, ken nagsapataan dagiti kaduana nga agakem para ti panag-santo ni Apo Verzosa. Kabayatan ti panagakem ni Arsobispo Marlo Peralta iti Nueva Segovia idi 2014, naitultuloy dagiti gannuat para ti panag-santo ni Apo Verzosa.  Idi Disiembre 2014, inyetnag ti Vaticano ti dekreto a Nihil Obstat (Nothing Hinders Decree) wenno awanen ti tubeng ti proseso ti panagsanto ni Apo Verzosa. Kalpasan ti pannakaaprobar dagiti pammaneknek iti pannakaikarina ket maawaganton ti Venerable wenno Pagrukbaban. Maital-onton kas “Blessed” wenno “Beato” kalpasan ti pannakapaneknek ti milagro iti panangibabaetna. Maideklaranton a santo no mapasamak ti maikadua a milagro iti panangibabaetna.

Kalpasan ti pannakaigibus ti proseso dagiti gannuat ti panagbalin a santo ni Apo Verzosa ken pannakaidatagton iti Vaticano kadagiti amin a mangsuporta a dokumento, mayor-urayto laengen ti grasia ti Dios no isuna ket maikari nga agbalin a santo. Uray saan pay a santo ni Obispo Verzosa ket ipampanakkelen dagiti Katoliko nga Ilokano gapu kadagiti nadiosan a galad, talugading ken gapuananna kas adipen ti Dios.

Naipasngay ni Apo Verzosa iti Vigan, Ilocos Sur idi Disiembre 9, 1877. Maikadua kadagiti pito nga annak dagiti agassawa nga Alejandro Verzosa ken Micaela Florentin. Nagadal iti Primaria Enzeñenza iti Vigan. Nagadal iti Seminario Conciliar iti Nueva Segovia de Vigan. Intuloyna ti panagadalna sadiay Colegio de San Juan de Letran. Nagturpos iti Theolohia iti Unibersidad de Santo Tomas. Naordenan a padi ti Nueva Segovia iti St. Paul Cathedral idi Disiembre 24, 1904. Iti dayta a panawen ti Nueva Segovia ket sakupna amin a probinsia iti Amianan a Luzon.

Nagserbi kadagiti parokia iti Vigan, Santa ken Bantay. Naibaon sadiay Ilocos Norte a kadagita a tiempo ket kakaro ti isisina iti Iglesia Katolika dagiti pasurot daydi Isabelo de los Reyes, pundador ti Iglesia Filipina Independeiente ken Padre Gregorio Aglipay nga Obispo Supremo. Iti panagmisionna iti maysa a barrio, sinaed ken pinana isuna ti lider ti maysa a sekta, ngem ti kabaliona ti napuntaan. Gapu iti tured ken pasnekna, adu dagiti simmina nga Aglipayano ti nagsubli a Katoliko.

Naordenan nga Obispo ti Lipa (Batangas) idi Septiembre 6, 1917 nga iti dayta a tiempo ket sakupna amin a probinsia iti Abagatan a Katagalogan. Isuna ti maikapat a Pilipino nga Obispo a Katoliko, ken umuna nga Ilokano ken naggapu iti Amianan a Luzon.

Nangbukel kadagiti adu a sentro ti katekismo tapno mayadal ti pammati. Binangonna ti kongregasion a Missionary Cathechist of the Sacred Heart idi 1923. Nangipatakder pay kadagiti adu nga institusion, simbaan, kapilia, kombento, monasterio ken seminario.

Nadutokan nga administrador ti Nueva Segovia idi 1926 – 1927 ket pinalukatanna manen ti Colegio Seminario iti Vigan tapno saanen a mapan sadiay Manila dagiti mayat nga agbasa a seminarista. Inlungalongna ti pannakaisina ti Diosesis ti Dagupan – Lingayen iti Nueva Segovia gapu ti kinalawa ti Pangasinan.

Idi panawen ti Maikadua a Gubat ti Lubong idi sakupen dagiti Hapon ti Lipa ken Batangas, inkagumaanna ti pannakasaluad ken pannakaipaing dagiti umili iti natalged a disso tapno saanda a dangran ken papatayen dagiti Hapones. Kalpasan ti gubat, inkagumaanna ti pannakatarimaan ken pannakabangon dagiti narelihiosoan a pasdek a nadadael. Pinabangonna ti monasterio dagiti mamadre a Carmelita iti disso a nakamasakeran dagiti adu a Pilipino tapno maikarkararagan dagiti napapatay iti dayta a lugar.

Idi Septiembre 15 – 26, 1948, napasamak dagiti mapapati a panagparang ni Santa Maria ken ni Teresita Castillo, agngayangay a madre a Carmelita bayat ti panagsa-Santo Rosariona iti hardin ti monasterio. Nagparang ti nagpabigbig nga Our Lady of Mediatrix of All Graces iti monasterio. Nagtinnag pay manipud iti tangatang dagiti rosas ken petal. Inarak dagiti adu a tattao dayta a pasamak tapno agdaydayawda iti Ina ti Dios.

Saan a patien ni Obispo Verzosa idi damo ti milagro, ngem naallukoy idi nasaksianna ti panagtudo dagiti rosas ken naregregan ti petal. Impalubosna ti panagdaydayaw dagiti tattao iti imahe ni Our Lady of Mediatrix iti monasterio. Dinutokanna pay a chaplain iti monasterio ti Auxiliary Bishop iti Lipa a ni Obispo Alfredo Ma. Obviar. Naglatak ti aparision ken nakadanon ti debosion iti Our Lady of Mediatrix iti Pilipinas, España ken New York, USA.

Nagtinnag a kontrobersial ti aparision sadiay Lipa ket adu dagiti lider ti pammati ti saan a namati iti pagteng a puon ti nakasukatan nga Obispo ti Lipa ni Apo Verzosa idi Disiembre 10, 1949. Simmukat kenkuana nga Apostolic Administrator ni Msgr. Rufino Santos (umuna a Pilipino a kardinal). Nasukatan pay ni Auxiliary Bishop Obviar. Kiniddaw ti konserbatibo a Papal Nuncio a Msgr. Egidio Vagnozzi ti pannakabukel ti komision a nangimbestigar ti aparision ni Santa Maria iti Lipa. Idi Abril 11, 1951, inyetnag ti komision ti pangngeddeng a saan a pudno a nagtaud iti Dios ti aparision, ket naipawil ti panagdaydayaw ken ni Our Lady of Mediatrix.

Nagbalin a natudio ni Obispo Verzosa iti Santo Papa. Uray namati iti aparision ni Santa Maria ket nagulimek iti pangngeddeng ti komision. Nagawid iti balayda iti Vigan. Nagbiag a nakurapay aginggana a nagsalog ti salun-atna gapu ti panagsagabana iti nervous breakdown. Pimmusay idi Hunio 27, 1954. Naitabon ti bangkayna idi Hunio 30, 1954 iti musoleo dagiti Obispo iti St. Paul Cathedral, Vigan. Nayakar idi Enero 2013 dagiti tulangna iti crypt iti abagatan a pader ti katedral tapno nawaya dagiti mamati a mapan agkararag ken dumawat ti panangibabaetna iti Dios. #