Footer

BANNER: 6 tattao, nanabtuog iti kampania ti kapolisan kontra paltog, droga

MAGSINGAL, Ilocos Sur – Innem a tattao a pakaibilangan ti maysa a barangay kagawad ken maysa a sumangsango iti kaso a frustrated murder ti nanabtuog iti ima ti kapolisan babaen ti inwayatda a nagsasaruno a search operations kontra mailemlemmeng nga armas ken droga  iti Magsingal ken Vigan City idi Marso 29 ken 30.

Iti pannakaisurat daytoy, maisagsaganan ti kaso  a panaglabsing iti RA 10591 maikontra kada Ryan Tolentino Oliver, 30, naasawaan ken Minelio Tolentino Oliver, Jr., 32, barangay kagawad;  Eugene Tejero y Somera, 46, naasawaan, laborer; ken Wilson Battad y Montano, 38, naasawaan, agpada a residente ti Barangay VI, Vigan City idinto a kaso maikontra iti RA 9165 kada  Jansen Costales Usana, 40, naasawaan, mannalon; ken Frodelio Parbo Umani, 45, awanan asawa.

Imet dagiti nagtitipon nga elemento ti CIDG Ilocos Sur, PDEA, PAIDSOT, PPSC, Ilocos Sur PPO, PIB Ilocos sur PPO, MARITIME, HPG ken Magsingal Municipal Police Station ti pito a search warrants a pinirmaan amin ni Judge Mario S. Domingo, MCTC, Magsingal-San Ildefonso, Ilocos Sur idi inwayatda ti operasion iti Barangay Patong, Magsingal, Ilocos Sur a yan ti pagtaengan dagiti dua a Tolentino ken ni Usana.

Babaen ti bileg ti uppat a search warrants iti dua a balay ni Ryan Tolentino, nakakumpiska dagiti operatiba iti maysa nga M16 baby armalite rifle (Elisco) nga addaan SN RP 049685 ken inserted magazine a nagkarga iti 26 bala; maysa a cal. 45 1911 pistol (Ranger) nga addaan magasin a nagkarga iti 7 a bala; maysa a long magazine para M16 rifle a nagkarga iti 4 a bala; 5 short magazine para M16; maysa a cal. 22 revolver nga awanan serial number a nagkarga iti 4 a bala; 2 bala para 12 gauge shotgun; maysa a  medium size heat sealed plastic sachet a nagkarga iti mapapati a shabu; ken assorted drug paraphernalia.

Dua a search warrants ti naiwayat maikontra ken ni Barangay Kagawad Minelio Tolentino Oliver, Jr. a nagresulta iti pannakakumpiska ti maysa a cal 45 pistol (Taurus) nga addaan SN NFM 22309; maysa a cal 45 pistol (Colt) nga addaan SN 2741401; maysa a magazine assembly para cal 45 pistol a nagkarga iti 6 a bala; maysa a magazine assembly para cal 45 pistol a nagkarga iti 7 a bala; maysa a magazine assembly para cal 45 pistol a nagkarga iti 3 a bala; ken maysa a bala para cal 45.

Nakakumpiska dagiti polis iti balay ni Jansen Costales Usana, iti nadumaduma a drug paraphernalia.

Addaan ni Usana iti standing warrant of arrest gapuna iti kasona a frustrated murder ken nakalista a No. 4 most wanted person iti Magsingal Police Station.

Naaresto pay ni Frodelio Parbo Umani, 56, baro, iti uneg ti balay ni Usana gapu iti panagikutna iti drug paraphernalia. Nakalista met ni Umani a drug personality iti PAIDSOT.

Kabayatanna, impakat dagiti elemento ti kapolisan a pakaibilangan ti CIDG Region I (CIDG Ilocos Sur Detectives), PIB, PPSC and Vigan City Police Station ti search warrants No. 16 ken 17 nga inyisio ni Judge Francisco Ante, Jr. ti Municipal Trial Court in Cities, Vigan City, iti balay da Eugene Tejero y Somera ken Wilson Battad y Montano, 38, agpada a residente iti Barangay VI, Vigan City.

Nupay negatibo ti resulta ti SW No. 17, positibo ti SW No. 16 a nakakumpiskaanda iti cal. 38.#