Footer

Dagiti Natuok nga Aldaw ni Maestro Teody

Sarita ni Jobert M. Pacnis

(Umuna a paset)

 

 

NALUKAG ni Maestro Teody iti agkakamakam a taraok dagiti manador a taraken ni Kapitan Sabas a kaarrubada. Kapilitan a bimmangon nupay nadagsen pay laeng ti kalub dagiti matana. Pasado ala  una itay yiddana ta inringpasna ti lesson plan-na ken in-check dagiti nabuntuon a papel dagiti adalanna iti Grade 7. Saanna nga ugali nga ipakorek dagitoy ta Math ngamin. Kayatna, isu lattan tapno maadalna no kasano ti panagobra dagiti ubbingna. Daytanto a pagkapsutanda ti pangrugianna a mangtulong kadakuada. Ken ammona no mano a puntos ti itedna kadagiti problem solving nga it-itedna. Saan a kas kadagiti dadduma a subject a mabalin lattan nga ipatsek kadagiti ubbing dagiti quizzes ta no saan nga identification dagitoy, multiple choice wenno enumeration.

Linidlidna dagiti matana. Bininsirna ti wall clock-da: alas kuatro media. Nalawag a makitana ti oras ta agpatpatnag ti silawda. Agsangit ngamin ti tallo ti tawenna nga ubingda no naiddep ti silaw a mariinganna. Naimbag koma no di nalaing nga ag-long playing. Nagrigat a pasardengen no narugianna ti agsangit.

Nagdiretsuan ni Maestro Teody ti nangisaang iti pammigatda. Nangtempla iti kape a paboritona a pangep-ep iti rusokna kabayatan ti panangur-urayna iti lutlutuenna. Ngem dina pinagbayag a pinaatianan ti basona ta kenkuana, awan ganas ti agkape no in-inutenna. Kasla di mapnek iti simsim laeng.

Apaglawag, nakaluton iti pammigatda. Ngem kairut pay laeng ti kukot dagiti kabbalayna. Innalana ti sagad ket rinugianna ti nagkaykay iti paraangaanda a kuna dagiti kaarrubada, kas kalawa ti mansion. Pudno man met. Nagrigat pay a kaykayan ta napno iti kaykayo iti aglawlaw. Ngem dakkel a gin-awa ti it-itden dagitoy ta malaksid a muyong a mangmangted iti presko nga angin ita a nagpudot ti panawen, mapagnumaranda pay dagiti maibungada. Isu pay a nayon iti panilpo ti biagda aglalo ket apagkatlo laengen ti mabatbati iti sueldona nga arig panggasolina laeng dagiti opisial ti gobierno iti maysa nga aldaw. Wenno kanenda iti maysa a first class a restaurant.

Masalsaludsodna ngarud no maminsan: Saan ngata nga agbelladan dagita nga opisial a kasta unay ti panaggastosda? No koma ilatangda laengen dagitoy kadagiti proyekto a pagnumaran dagiti umili? Wenno mainayon iti sueldo dagiti kas kenkuana a bassit-usit laeng no maidilig iti saan a mabilang a trabahoda iti uneg ken ruar ti pagadalan. Isuda nga agtugtugaw lattan, isuda pay ti adu ti sueldona. Baliktad a balinsuek a kinapudno.

Riniing ni Maestro Teody ni Jethro, ti ubingda nga addan iti Maikalima a Grado. Mapilpilitan daytoy a bimmangon.

“Agidulinkan ta mangantayton,” kinunana sa tinallikudanna daytoy tapno mapanna sakduan ti pagsarbanda.

Ngem napno met laengen ti nangisit nga Orocan a pagsarbanda, ti paginumanda, ken ti washing machine (a paglabaan ti asawana ‘ton makaiwakas iti kusina), awan pay ti balongna a timmammidaw iti kosina. Agur-urok man gayamen daytoy idi sublianna iti kuartona.

Riniingna manen ti ubingda. Isun a mismo ti nangipakni iti nagiddaan daytoy. Nakamisuot ni Jethro a nagturong iti salasda ket nagdiretsuanna a linukatan ti TV. Iti channel dagiti karkarton ti nangipananna.

Nasermonanna la ket ngarud ti ubingda. “Aldawen, dayta pay laeng ti sinangom, balong,” kinunana. “Ania pay oras ti kunam, ‘ya? Agalas saisen!” Atiddog ti rabii kadagitoy isu a kaaduanna ti maladladaw kadagiti ubbingda uray iti hayskul. “Isaganamon ‘ta bagmo baka adda malipatam,” tinallikudanna daytoy ket simrek iti kuartoda nga agassawa. Nakakukot pay laeng ti asawana nga arakupna ni Jiemil Anne, ti tallo ti tawenna a maikadua nga ubingda.

“’Mang,” impekkelna iti abaga ni baketna, “agriingkayon… aldawen.”

Ngem di namki ti asawana. Yinugyogna ti abaga daytoy. Nagmulagat.

“Apay, ‘ya?” sinaludsod ti asawana.

“Bigaten, bumangonkayon… mangantayon.”

“Umunakay’ lattan ken ni Balong… makaturturogak pay laeng,” ket nagsikigen  ti asawana.

Napasanamtek. Saanda manen nga aggigiddan a mangan. Dina kayat ti kasta ngem ania ngarud ket masapul met a yunada lattan nga agama ti mangan ta didanto maladaw iti eskuela.

Apagisu a makagao ni Jethro idi makatadog iti kosina. Pinagsanguanda ti naiskrambol a tallo nga itlog, salad nga uggot ti kamotit, dua a noodles, ken sangasapad a kasla tangan-saka a lakatan. Permi a pinagigup ti ubingda ken panagsidana iti paboritona nga itlog.

“Awan met laeng ti nalipatam nga asaynmentmo, Balong?” sinaludsodna.

“Awan, ‘pang,” nainut a sungbat daytoy kenkuana.

“Lalaingem, a, tapno makastrekka uray iti top ten laeng,” kinunana. Ta manon a tawen, aya, nga ar-arapaapenna nga umuli koma met iti stage tapno mang-ribbon. Ngem ania ngarud ket mayay-ayam sa met ti balongna ti panagbasana. Mabain pay no dadduma ta isu a maysa a maestro, saan man la a makastrek iti honor roll ti putotna idinto a dagiti di nagrib-ribbon a nagannak, isuda ita ti adda annakna a makipinpinnatapok kadagiti kaklaseda.

(Maituloyto)

Comments are closed.