Footer

Dati a mayor, naaresto gapu iti indiscriminate firing

CANDON CITY – Inaresto dagiti polis ti maysa a dati a mayor ti Quirino, Ilocos Sur gapu iti panagpaputokna sadiay Barangay San Andres, ditoy siudad iti rabii ti Abril 1.

Nabigbig ti suspek a ni Elmer Gomintong y Cagdan, 55, naasawaan, dati a mayor ti Quirino, Ilocos Sur ngem residente iti Barangay San Andres, Candon City.

Dagus a nagresponde dagiti polis kalpasan a nakaawatda iti report nga adda napasamak nga indiscriminate firing iti kalsada nga asideg ti maysa a sari-sari store iti nadakamat a barangay ket nadatnganda ni Gomintong  a nakatugaw iti monoblock chair, awan ti akinngato a kawesna ken nakasakbit ti maysa a paltog iti makannigid a siketna.

Kinumpiskar dagiti polis ti  paltog ni Gomintong a caliber 38 revolver, snub nose Taurus, made in Brazil nga addaan serial Number 1064173 a nagkarga iti maysa a bala ken tallo a kapsula iti chamberna sada inaresto ti dati a mayor idi awan ti maipakitana a dokumento para iti panagikutna iti paltog.

Naipan ni Gomintong iti Candon City police station para iti umisu a disposision.

Kabayatanna, malaksid ti frustrated murder, naiyendorson iti city prosecutor’s office, Candon City ti kaso a panaglabsing iti RA 10591 ken Comelec gun ban maikontra ken ni Roger Mangay-ayam y Annaguey, 49, naasawaan, ken residente iti Barangay Sto. Tomas, Candon City.

Maipalagip a bayat ti panagiinom da Mangay-ayam, Alex Mangasar y Bisieg, 40, naasawaan, ken dadduma pay a kakaduada  idi rabii ti Marso 22, naaddaanda ken iti biktima a ni Mangasar iti saan a panagkinnaawatan.

Naggawid ni Mangay-ayam ket idi nagsubli, addan iggemna a paltog ket pinaputokanna iti sumagmamano a beses ni Mangasar a nakatiruan ti akingangato a paset ti tianna ken ti siketna.#