Footer

Drayber, naireport a nagtakaw

NARVACAN, Ilocos Sur – Nabileg a sulisog ti kuarta, nangruna no dakkel a kantidad, a mangpakullaap iti panunot ti maysa a parsua ket makaaramid iti saan a maitutop.

Maysa a babai a drayber ti inreport ti balo nga imanmanehuanna gapu ta isu ti maitud-tudo a nangtakaw iti kuarta, doliar, nadumaduma a tseke ken ipod daytoy a nakakabil iti nangisit a travelling bag nga adda iti uneg ti lugan ti baket.

Iti pulongna iti polis, innaganan ni Josephine Vigden y Bersamina, balo, ken residente iti Barangay Margaay, Narvacan, Ilocos Sur, ti suspek a ni Julita Fernando y Dula, residente iti Barangay Paratong, Sta. Lucia, Ilocos Sur a nangtakaw iti kuartana a P114,000.00 a naikabil iti nadumaduma nga enbelop, $6,600.00, assorted a tseke, Samsung 7.7 ipod nga agbalor iti P47,000.00, nadumaduma a checkbook ken cashbook ken sabsabali pay a napapateg a dokumento.

Segun iti inisial a panagimbestiga dagiti polis, ni Fernando ti nagmaneho iti SUV a lugan ni Vigden iti panagawidda iti Barangay Margaay, Narvacan, Ilocos Sur manipud iti Makati idi Marso 23.

Kadua ni Vigden ti gayyemna a ni Maria Elsie Tajo ken ti katulong daytoy a managan Rodora Mendoza.

Idi nakadanon da Vigden iti Rosario, La Union idi agarup alas 4:00 ti parbangon ti nadakamat a petsa, inkeddengna ti panaginanada.

Imbatida ni Fernando ta imbaga daytoy a maturog laengen iti uneg ti kotse.

Apaman a nakadanon da Vigden iti Barangay Margaay, Narvacan, nagdardaras ni Fernando a naggawid.

Segun ken ni Vigden, idi luktanna ti bagna, nakitana laengen a nalaslas daytoy ket awanen ti kuartana, tsektseke, doliar ken ipodna ket suspet-sana a ti drayberna ti nangtakaw.#