Footer

Happy Graduation, Kunam?

Sinursuran:  Kolum ni Jobert M. Pacnis

(Umuna a paset)

 

   NAUNDAY a panawen metten daydi panagisuotko iti toga idi nagturposak iti hayskul, ken uray iti kolehio. Ngem napatak latta dagiti ladawan nga imbati dagidi nga okasion iti biagko. Wen, daydi commencement exercise-mi idi hayskul, nangukrit iti nagduduma a rikna.

Umuna ditoyen ti ragsak. Kamaudiananna, nalpasko met laeng ti hayskul nupay kasano ti rigat dagiti nagannak kadakami nga agkabsat. Agmulamula iti natnateng ni tatang nga isu met ti ilakolako ni nanang iti plasa iti inaldaw. Nayonan ni nanang dagitoy bassit nga apit babaen ti panagangkatna tapno laeng ad-adu ti maganarna nga usarenmi nga agbasa.

Maikadua ti liday. Iti uneg ti uppat a tawen a panagkakadua kadagiti kaadalan, nabukel, natubay ti natibker a kayammet iti tunggal maysa. Ditoy a nangrugi a timmubo ti ayat iti sabali a seksualidad a mangnamnama nga agbalinto a pagulidanan iti masakbayan. Innangaw, serioso a bambanag, panagbabalubal iti nadumaduma a tay-ak wenno asignatura, nagbalinda a paset iti inaldaw a panagbalin nga adalan.

Ngem iti idadateng ti commencement exercises, masapul nga aklonenmi nga agsisinakamin tapno tun-oyenmi dagiti kabukbukodanmi nga arapaap. Mabalin a daytoy a panagsisina, addanto met laeng panagtutugmok ngem  no kaano, narigat nga ibaga. Ta mabalin pay a dimonton makita ti kaadalam, depende iti diktar ni gasat.

Ken maudi, danag. Wen, ta iti kasasaadmi iti biag, mapagduaduaan ti panagtuloyko iti kolehio. Mabalin a mapagenroldak ngem kasanon ti aginaldaw a gastuek aglalo ket awan met ti napia a panggedan da nanang ken tatang?

Inkagumaak ngarud, uray addaak laeng iti top ten, ti simrek nga iskolar. Pagyamanak la unay ta naigasatak a nakapalag-anan dagiti dadakkelmi. Ninayonak pay babaen ti saanko a panaggasto iti awan kaes-eskanna a bambanag. Napia ketdi ta saan pay idi nga uso ti selpon, social media ken no ania la ditan a gadget ta di ket koma nga isu a nakaisungsongan.

Nakatulong pay kaniak idi ti bayad dagiti sinursuratko a naipabpablaak iti Bannawag, HomeLife ken Liwayway (saanko pay idi a naangotan ti TNM, wenno di pay idi naipasngay). Wen, diak ibain, nagsursuratak idi iti Pambata a benneg ti Liwayway ken kasta metten iti Tumawa at Maglibang. Ken adda saggaysa a daniwko a rimmuar ditoy. Iti HomeLife, dandaniw ken sarita dagiti sinuratko.  Kasta metten iti Bannawag. Bassit man ti bayad dagitoy a sinurat, dakkel a tulong kadagidi a panawen.  Inayon payen ti lumib-alib-at idi a panangabakko kadagiti para agdadamo a pasalip iti panagsuratan.

Dakkel a pagyamanak iti Dios kadaytoy nga impaayna a talentok ta dakkel ti naitulongna iti pannakaragpatko iti arapaapko malaksid a maysa daytoy nga akem a kasinginna ti risgo aglalo no addada madalapus kadagiti sinurat iti ayat a mamagbaliw iti gimong. Wen, kas mannurat, napadasak daytan kunkunada a naikaso iti libelo gapu iti maysa a sinuratko iti kallabes. Ngem dagus a naabsuelto daytoy ta maysa a piksion dayta a sinurat ken saan a nakita, naanag ti nagreklamo ti “twist” iti ending-na.

KET ita, panawen manen a pannakaisuot dagiti toga kadagiti agturpos nga agad-adal. Naglabbet la ketdi  met a rikna ti dumdumges iti tunggal maseknan.

Adu a nagannak ti agturong ita iti entablado tapno sagrapenda ti bunga ti nagrigrigatanda kasta metten dagiti annak. This is our moment, kasla kunkunada.

Happy Graduation, kanigid-kanawan la ketdi manen a maikablaaw (personal wenno iti social media). Ngem agbalin koma a nalawag kadatayo nga iti hayskul, awanen dayta makuna a graduation gapu kadayta K-12 a sistema ti edukasion iti agdama. Sumrekda iti Grade 11 (Senior High School) itoy umay a Hunio. Agturposda laeng iti Junior High School nga ayanda iti agdama. Moving-up kunada kadaytoy– kas iti kinder.

Isu a ditay koman masdaaw no saan laeng nga iti programa dagiti kinder a mabasatayo dayta moving-up. Pati iti hayskul, kas bilin ti Departamento. Ngem aduda la ketdi dagiti pagadalan ti mang-modify kadaytoy tapno saan met nga agparang a kasla kinder dagiti adalanda. Ketdi, mabalin a maymaysan ti programa para kadagiti Grado 7 agingga iti Grado 10. Saanen a kas idi a maisina, nagargarbo, dagiti agturpos iti hayskul.

(Adda tuloyna)

Comments are closed.