Footer

12 napadayawan kas outstanding “Migranteng Juana” iti Region 1

SAN FERNANDO CITY – Sangapulo ket dua a babbai ti pinadayawan ti Overseas Workers Welfare Administration – Regional Welfare Office 1 (OWWA-RWO1) kas outstanding “Migranteng Juana” iti Ilocos Region itay nabiit.

Kinuna ni Justine Marbella ti OWWS a napadayawan dagiti 2016 Migranteng Juan awardees gapu iti maipagpannakkel a naaramidanda kas mangmangged iti panagdur-as iti aspeto ti panagtitipkel ti pamilia, serbisio iti komunidad ken panagnegosio, a nagbalinanda a pagtuladan a modelo kadagiti padada a babbai.

Kinuna ni Marbella a nagakem pay dagiti napadayawan kas partner ti  OWWA-RWO1 iti promosion ken pannakasalaknib ti pagimbagan dagiti overseas Filipino workers ken dagiti pamiliada, ta datida met nga OFWs ket itan addaandan iti asawa ken nagannak kadagiti aktibo nga OFWs.

Saggatlo a babbai tunggal probinsia ti napadayawan:

Iti Ilocos Norte, Elizabeth A. Gorospe ken Flordeliza F. Aceret agpada a taga-Bacarra, ken Purisima M. Torralba ti Badoc;

Ilocos Sur: Eliza E. Acena ti Santa Maria, Loida T. Pallones ti Candon City, ken Milagros L. Jandoc ti Santa Cruz;

La Union: Concepcion V. Sabas ti Bangar, Terenciana G. Martines ti Luna, ken Jene W. Austria ti Sudipen;

Pangasinan: Jocelyn B. Bersano ti  Alaminos City, Mary Grace F. Rosario ti San Carlos City, Evelyn Bascos Basconcillo ti Mangaldan.

Napadayawan dagiti awardees kas paset ti selebrasion ti 2016 National Women’s Month a nakaiyunay-unayan ti pudpudno a kababalin ti mararaem nga OFW. Ti tema ita a tawen: “OWWA Juana: Migranteng Pinay, Dakilang Tunay.”

Iti panagbitla ni Atty. Florence Marie Gacad-Ulep, presidente ti Regional Advocates for General Equality (RAGE) iti Region 1, dinayawna ti annongen dagiti babai iti sosiedad, idinto a dinakamatna a nagbalin ti pannakapabileg dagiti babai nga instrumento iti sibubukel a panagdur-as ti komunidad.

Indagadag met ni Gerardo C. Rimorin, OWWA OIC kadagiti awardees ti panagtuloyda a pagtuladan iti panagdur-as, a di maiddep ti umap-apuy a tarigagayda ken agpaay ti lawagda a silnag kadagiti amin a padada a babbai. (Manipud iti report ni Miriam P. Aquino, PIA, La Union)

Comments are closed.