Footer

2 natiliw nga illegal nga agkalkalap

SANTIAGO, Ilocos Sur – Iti baet ti kampania ti gobierno probinsial maikontra iti illegal a panagkalap, dua manen a mangngalap ti natiliwan nga agkalkalap babaen iti illegal a wagas iti kabaybayan ti Barangay San Roque ditoy nga ili idi parbangon ti Abril 8.

Innaganan ni Sotero Bragado y Alverade, Municipal Fisheries and Aquatic Management Council ti Barangay San Roque, Santiago, Ilocos Sur dagiti dua a suspek a da Jeffrey Abucay y Carpio, 36, naasawaan, ken Roel Daproza y Collado, 36, naasawaan, ken agpada a residente iti Barangay Lingsat, Sta. Maria, Ilocos Sur.

Nasukalan dagiti suspek nga agkalkalap babaen iti compressor, a karaman kadagiti illegal a pagkalap ditoy probinsia.

Malaksid iti compressor, nakumpiska pay iti ikut dagiti suspek ti maysa a demotor a bangka, maysa a flashlight, maysa a pana, diving mask ken nadumaduma a klase ti ikan a mapattapatta nga agdagsen amin iti 4 kilos.

Naikustodia ken ni Ambucao Barangay Captain Ruben Agosto ti bangka idinto a naipan dagiti suspek ken fishing paraphernalia iti police station ti Santiago.#