Footer

Dagiti Natuok nga Aldaw ni Maestro Teody

Sarita ni Jobert M. Pacnis

(Maikadua a paset)

 

Anus ‘di nalpas nga anus no kasta a suruanda. Ngem kasla papaaweng sa kenkuana ti mayad-adal. Kaykayatna ti mapan agarnas iti pailakona ken ni apongna a baket idiay ili. Maay-ayatanto daytoyen no maawatna ti bayad dagiti bulong ti kamotit, marunggay, wenno bunga ti kalamansi nga arnasenna iti arubayanda. Nagpaaramid pay ken ni lilongna iti bassit  a kamarin a yan ita dagiti tarakenna a manok ken pato. No ketdi simmangpeten a naggapu iti eskuela, ken no kasta a malpasna ti pammigat, pagdiretsuannan dagitoy a pakanen ken ikkan iti inumenda.

Saan laeng a dayta. Adda pay uppat nga asona. Ti anusna ketdi a mangpakan kadagitoy. Banbantayanna agingga a maibusda ti intedna a kanenda.

Ala, nasayaat met ketdi ta ammo ti ubingda dagitoy a bambanag a saan laeng nga ay-ayam ti adda iti isipna. Pagsayaatanna pay, dagiti mapaglakuanna, ammonan nga idiretso iti tubongna a naaramid iti sangalawas a kawayan.

Ngem ti laeng rigaten ni Maestro Teody, ti kinapatayna no trabaho iti balay ti pagsasaritaan. No mabaon, nagadu a sao ti ibusenna. Ket no dadduma, maibus ti pasensiana ket mapagsawsawanna daytoy– nga ammona a di koma rumbeng!

Adda met pagpatinggaan ti anus, kunkunana latta no kuan iti nakemna. Ta saan met a nagkurang. Bagbagaanna met daytoy a kanayon.

Kas met laeng kadagiti adalanna. Nakasuksukirda. Ipapaawengda ti maibagbaga kadakuada aglalo dagiti leksionda. Uray pay kadagiti trabahoda. Kadawyan pay a dida mangipirpirit. Isu a no maminsan, mapunuan ket kasla kayatnan ti agsardeng nga agisuro. Amkenna no di makateppel ket makadisso iti ubing—banag a di rumbeng ta protektado la unayen dagitoy kadagiti “kalinteganda.” Ngem kasanoda metten a mangisursuro a baddekendan ti dayawna? Agulimekda lattan ta saanda met mabalin ti agpungtot wenno agdangran? Ania ket a rigaten ti situasionda a mannursuro.

Nakadigosen ni Maestro Teody idi agsabatda ken ni baketna iti kosina.

“Saankan a sumrek,” kinuna daytoy kenkuana.

Apagbiit laeng ti pannakasdaawna. Ammona lattan ti makagapu. “Sige,” kinunana lattan. Narigat no pabasolenda pay no kasta nga adda maidillawna. “Itulodko latta ngaruden ni Jethro iti eskuelada.”

Mangmanganen dagiti aginana idi makasangpet a nangitulod iti baroda.

“Sakduannak man iti pagdigosko,’pang,” inrupanget ni baketna.

Mapan san a talaga, nakunana iti isipna. Ta kasta man idin kadagiti dua a bungada.

Nagtungpal a dagus. Pinnunnona ti planggana iti banio. Kalpasanna, isu pay laeng ti pannakalagipna nga ag-text iti prinsipalda iti Cabaybay National High School. Impakadana ti dina iseserrek.

Nagdigos a dagus ni baketna apaman a nakapagpasar. Intulodna met ni Jiemil Anne iti ‘yan da apongna iti abagatan laeng ti balayda. Saanen a nagdamdamag dagitoy no apay nga ipaaywanna pay laeng ti ubing.

Naginnaw. Sa sinagadanna ti uneg ti balay kalpasanna.

Nagtanittit ti C1-na, ti selponna nga agwalo a tawenen. Malagipna a nagtaud ti inggatangna iti inabakna idi iti panagsuratan ti daniw a para ubbing. Kasla kaano la daydi a panangabakna. Ita addan trabahona, dina pay nasukatan. Agkakadakkel dagiti selpon dagiti kaduana iti pagadalan. Isu laengen ti nakapimpiman iti gadget. Ngem ti napateg ken ni Maestro Teody, makatawag ken maka-text ti selponna.

Naggapu iti prinsipalda ti text: We nid d key of the cabinet wer u placed the amplifier.

Malagipna nga agpayso. Adda misa ti pagadalanda ita nga aldaw. Binulan a mangannong iti misa ti CNHS para iti spiritual aspect ti biag dagiti ubbingda. Ket naitalek kenkuana ti sound system-da.

Napakudkod. Kapilitan nga ipanna ti tulbek. Awan met ngarud ti mabalinna a pagpaw-itan. Kinse minutos a motorenna ti eskuelada. Nagpakada ken ni baketna.

“Panawannak a kastoy?” immulagat ti asawana.

Inlawlawagna ti amin. Ngem di maawatan ti asawana. Inayaban ni Maestro Teody ni Manang Pinang nga inana. Imbilinna a bantayanna pay laeng ni baketna.

Saanen a nagdigos ta agdardaras.

“Pardasam ta labaamto pay dagiti murengtayo!” impakamakam kenkuana ti asawana.

Inyawatna lattan iti guardia ti tulbek idi makadanon iti eskuelada. Saanen a simrek. Maawatanda met ngata.

Inruarna a dagus dagiti lunesda apaman a nakasubli iti pagtaenganda. Rinugianna ti nag-washing. Pangur-urayanna, namrayanna ti nagkaykay iti aglawlawda. Nagadu manen a nagtinnnag a bulong dagiti mangga iti sango ken likud. Kasta met dagiti abokado, santol, anangka ken arusip.

Madlawnan ti bannogna. Ngem nalawa pay ti sagadanna. Pasado alas nueben idi makalaba ken makasagad.

Isu met a paayaban ti asawana ni Baket Simang a partera iti barangayda.

“Apay pay laeng? Idiretsoka lattan, a, iti ospital wenno idiay RHU,” intubngarna.

“Diak la kayat ti agur-uray idiay. ‘Ka ketdin ayaban ta kitaenna no mapanen wenno mabayag pay,” indagdag ni baketna a medio adda kabulonna a pannakasiudot.

(Maituloyto)