Footer

Happy Graduation, Kunam?

Sinursuran:  Kolum ni Jobert M. Pacnis

(Maikadua a paset)

 

Ania man iti awag kadayta, ti napateg, agtuloy iti sumaruno nga addang wenno level ti ubing. Maipalagip laeng a dina koma pagbalinen a tulbek dagiti pammadayaw iti idadakkel ti ulona. Igunamgunam koma dagiti nagannak nga ad-adda nga igaedna ti agadal tapno maipamatmatna a maitutop kenkuana dagita a pammadayaw.

Isuna laeng, a, no nagun-od dagitoy a medalia ken ribbon babaen dagiti agsasaruno a donasion iti pagadalan. Puera delos buenos ngem adu pay laeng ti kastoy iti agdama a sistema ti edukasiontayo. Ken adu latta dagiti pumasa a dina rumbeng gapu kadagiti nagduduma nga special project.

Nasayaat laeng no dagita nga “special” ket agpaay/maipaay iti pagadalan para kadagiti sumarsaruno nga ubbing. Ti laeng makadakes no yawid daytoy dagiti mannursuro a nagpa-project.

Ay, aduda latta ti kasta!

Ita, kaniak a biang, saan a mapabasol dagiti mannursuro no apay nga agpa-special project-da. Daytoy pammilin ti Departamento a mass promotion ti makitkitak a rason. Gapu ta pagaammon daytoy dagiti ubbing, saandan (dagiti dadduma) nga idaddadaneng ti panagbasada. Absent to the max, saan a panag-comply kadagiti alagaden iti siled ti ar-aramidendan. Uray ta mai-promote-danto latta kano iti sumaruno a level. Uray man ket no kanayon nga awan wenno bassit-usit ti maalada iti eksam!

Ay, tapno di latta kastan ti kalakana ti pumasa, mapilitan a mangparigat ni mannursuro babaen ti panagpaipasana iti special project. Ngem kas nakunak, nasayaat laeng no agpaay iti pagadalan dayta. Ti dakes no yawid ni mannursuro idiay balayda.

Ita a panagririkep ti klase, gapu ta eleksion, mabalin a kinilo a medalia ti mayukkor dagiti adda iti honor roll. Kaadu ti agdonar! Uray pay nanumo a para kagawad ti ili ket ibunonganna dagiti top ten. Ne, agkuentatayo. Namak payen no amin a nakatugaw a kagawad, sa dagiti baro a papili ket agited iti medalia? Mano daytan? Inayon payen dagiti agtaray a bise-mayor, mayor, SP, kongresista, bise-gobernador, gobernador agingga iti presidente.

Agarukongen ti ubing inton umulog iti entablado!

Plus dagiti awardna!

Daytoy panagrikep ti klase, saan pay nga asi-asi ti magastos— nupay imbilin ti Departamento ti pannakaisimple koma ti programa a kayatna a sawen, liklikan ti adu a gastos. Ngem saan latta met a maliklikan daytoy ta kayat dagiti nagannak a nagarbo met ti programa. Ay, ket mabati latta a sumursurot dagiti babassit iti mapagtutulagan nga annongen. Ti pay rigatna no honor roll ti ubing, malaksid kadayta ibatida a “pakalaglagipan” ti pagadalan kadakuada, adda bagina a lutuen para kadagiti kangrunaan a bisita. Saan met  a dika mabain a mangipasango iti nanumo a putahe. Di kad’ agkaut latta iti bulsa dagiti maseknan.

Kasanon ngay no nanumo laeng a mintalon wenno makipaglablaba dayta a nagannak? Yutanganna?

Kadagitoy, makotaan (quota) payen dagiti nagannak dagiti adda iti honor roll nga ubbing. No top three (iti elementaria), mabalin a ribu dayta; top four to ten, di a nababbaba ngem lima gasut. Nayon pay dayta dagiti rumbeng nga isagana para iti bisita. Di dakdakkel manen no iti hayskul?

Dagitoy koma a tradision ti masapul a mapukawen. No di man a kasta, pagbalinen lattan a boluntario. Saan koma a pakasarsaritaan dagiti nagannak no awan ti maibatida a pakalaglagipan (a namaterialan) iti pagadalan ta nanumoda laeng. Ta saan a maymaysa ti aldaw. Mabalin met nga agsubli ti ubing inton naan-anayen ti pannakagun-odna ti arapaapna wenno maysan a naballigian nga indibidual iti tay-ak a pinilina. Daytoyto ti panawen nga iwarisna, no mapanunotna a kasta, ti grasia a naawat/maaw-awatna kas pagsubadna iti alma mater-na. Saan ket a kedngan idan ita ta agturposda pay laeng iti elementaria wenno hayskul a rugrugi laeng ti narigrigat pay nga agpang nga agturong iti pannakatun-oyda kadagiti arapaapda.

Ala, nupay saan a mayannatup itan iti hayskul dayta Happy Graduation gapu kadagiti nadakamat a rason, nabara latta a kablaaw kadagiti nagannak. Idawdawattayo nga agbanagto koma iti nasayaat dagiti bungatayo. Ikararagtayo a maikkatto metten dagiti pakailumlumloman a tradision iti panagrikep dagiti klase.

Aglalo itan ta nanayonan iti dua a tawen ti basic education-tayo!#.

Comments are closed.