Footer

Job fairs angayen ti DOLE manipud Abril agingga Hunio

SAN FERNANDO CITY – Impakaammo ti Department of Labor and Employment nga ad-adu pay a panggedan ti agur-uray kadagiti agbirbirok iti trabaho babaen dagiti job fairs nga angayen daytoy nga opisina iti nadumaduma a lugar iti rehion manipud iti Abril agingga iti Hunio daytoy a tawen.

Kinuna ni DOLE-1 Regional Director Grace Ursua nga ang-angayen ti opisinana dagiti job fairs tapno nadardaras a maiyempleo dagiti agbirbirok iti panggedan.

Segun iti regional director, agsipud ta agtitipon dagiti employers nga agbirbirok kadagiti aplikante iti maymaysa a disso, nalaklakada a mayempleo dagiti jobseekers para kadagiti bakante a posision iti kompaniada ket mapabassit ti magastos dagiti aplikante iti panagsapulda iti trabaho.

“Ar-aramidenmi ti kabaelanmi iti DOLE ken dagiti partnermi a mangpalag-an kadagiti agbirbirok iti trabaho nga agsapul iti panggedan a maiyanatup iti kredensialda, siglat ken interesda ken iti pannakabirok dagiti employers kadagiti maitutop a empleadoda a makatulong iti panggep ti negosioda,” kinuna ni Ursua.

Segun iti regional director, maisayangkat dagiti job fairs kadagiti sumaganad a lugar: April 14 – Capitol Complex, Lingayen, Pangasinan; April 25 – ABC Hall, Sudipen, La Union; April 26 – Sinait, Ilocos Sur; April 27 – Cabugao, Ilocos Sur; May 1 – SM City Rosales; Robinsons Place, San Nicolas, Ilocos Norte; Calasiao, Pangasinan; June 1 – Capitol Complex, Vigan City, Ilocos Sur ken June 12 – Nepo Mall, Dagupan City and La Union.

Kinuna ni Ursua nga ad-adunto pay ti pakaammoda bayat ti yaasideg ti panagtapos ti umuna a kagudua ti tawen.

Innayonna nga ipingpinget ti ahensiada ti pannakaangay dagiti job fairs ken implementasion iti career guidance advocacy program (CGAP) nangruna ita a panaggragraduaran dagiti rinibribu a manamnama nga agbirok iti trabahoda. (Manipud iti report ni Joanne Namnama P. Dilim, PIA La Union)

Comments are closed.