Footer

Lalaki, nagandat ti biagna

STA. CATALINA, Ilocos Sur – Iti baet a nainget a maipakpakat ti election gun ban iti probinsia, maysa a shooting incident ti napasamak iti Barangay Cabaroan, ditoy nga ili idi rabii ti Abril 6.

Iti pannakaisurat daytoy, saan pay nga ammo ti kinasiasino ti pimmaltog ken ni Basilio Rea, Jr., y Rabacal, 27, naasawaan, ken residente iti nadakamat a barangay.

Naitaray ni Rea iti St. James Hospital tapno maagasan. Nagsagrap ti biktima iti dua a sugat iti abagana.

Kas maibatay iti police journal, idi agarup 11:13 ti rabii ti nadakamat a petsa, yur-uray da Rea ken dagiti kakaduana a pakaibilangan da Michael Bryal Padua y Valledor, 24, naasawaan; Hernan Tabut y Apolinar, 33, baro; ken Barangay Kagawad Mon Irel Petate y Labuni, 25, naasawaan, residenteda amin iti Barangay Cabigbigaan, Sto. Domingo, Ilocos Sur ti meriendada idi mapasamak ti krimen.Segun ken ni Petate a nakatakder iti asideg ti ridaw, nakitana ti maysa a motorsiklo a nagsardeng iti akinlaud a paset iti asideg iti ruangan ket dimsaag ti drayber a nakaaruat iti nangisit a t-shirt, short pants ken helmet sa mapapati nga immuneg iti paraangan.

Pinakaammuan ni Petate ni Rea mainaig iti sumungsungad a sangaili.

Rimmuar ni Rea iti balay ngem kellaat a pinaltogan ti suspek iti sumagmamano a beses sa naglibas a nagpaabagatan a direksion a nakasakay iti Yamaha Mio a motorsiklona.

Maysa a cal. 45 ti mapapati a naaramat iti pammaltog kas maibasar iti uppat a kapsula ken maysa a buli a narekobre iti crime scene.

Nangiwayat ti polis iti hot pursuit operation maikontra iti suspek ngem saandan a nasapulan.
Saan pay nga ammo ti motibo ti pammaltog.#

Comments are closed.