Footer

Medalya ng Papuri, naiyaspili iti polis-Sta. Catalina

SAN FERNANDO CITY – Pinadayawan ti Provincial Police Office 1 ti maysa a polis manipud Sta. Catalina police station gapu iti impamatmatna a dedikasion ken saan a managimbubukod a serbisio iti simple a programa a naangay ditoy idi Abril 4, 2016.

Mismo a ni Fisher A. Guerrero, officer in charge ti Philippine Veterans Affairs Office, La Union ti nangiyaspili ti Medalya ng Papuri ken ni PO2 Edward P. Remolete ken iti panangasistir ni PRO1 Regional Director Chief Supt. Ericson T. Velasquez ken ti Command Group  kabayatan ti tradisional a flag raising ceremony iti PRO1 grandstand iti nadakamat a petsa.

Maipalagip a naispal ti biag ni David Raguindin gapu iti yaarayat ken panangalaw ni Ramolete kenkuana bayat ti panagdigos daytoy iti kabaybayan ti Barangay Paratong, Sta. Catalina idi Marso 26.

Mapapati a nakainum ni Raguindin ket bayat ti panaglangoyna iti baybay, inyanud ti napigsa a koriente iti naadalem a paset.

Naited ngarud ti pammadayaw ken ni Ramolete gapu iti makaparaem a naaramidanna a nakatulong iti pannakagun-od kadagiti panggep ken obhetibo ti Philippine National Police a rumbeng a bigbigen ken tuladen, segun iti padamag manipud iti PRO1.(sae)