Footer

BANNER: Tardiet ti drug search ops, simmuko kalpasan 10-hour standoff

MAGSINGAL, Ilocos Sur – Negatibo iti droga ti balay ti suspek a nangiwayatan dagiti polis iti search operation sadiay Barangay San Vicente ditoy nga ili idi agsapa ti Abril 8. Ngem imbes a naannayas koma ti operasion dagiti polis, nagbalin ketdi a tensionado ta saan nga intulok ti bumalay a masukisok ti balayna.

Nagpaputok pay ni Nel John Isaguirre kas ballaagna a saan nga agbasak dagiti pannakabagi ti linteg a mangiwayat iti panagsukisok a nangbuak la ket ngarud iti talinaay dayta a lugar iti dayta nga aldaw.

Dita a nangrugi ti pannakinegosasion ti kapolisan ken ni Isaguirre tapno ipalubosna ti panagsukisok ken isukona ti paltogna.

Ngem nagtungpal nga standoff ti situasion ta natangken ti pagtaktakderan ni Isaguirre a saan a masukisok ti balayna.
Iti kabayag ti negosasion, arig saan a makakunail ti trapiko gapu iti kaadu dagiti lugan a naipit iti kalsada nasional iti baet ti dayamudom dagiti biahero nangruna dagiti mapan agopisina iti siudad ti Vigan ken kaparangetna nga il-ili.

Naammuan ti Tawid News a malaksid kadagiti operatiba ti Provincial Police Office, immarayat pay dagiti kameng ti Special Weapons and Tactics (SWAT)-Region 1 tapno malettat ti stand-off.

Agalaskuatron ti malem idi timmulok met laeng ni Isaguirre a nangisuko kadagiti armasna a naammuan idi agangay a maysa a Glock Caliber 40 ken maysa a cal. 38 revolver a nagkarga iti innem a bala.

Nakakumpiska pay dagiti polis iti dua a magasin ken 26 a bala.

Kas maibatay iti report, agarup alas singko ti bigat ti Abril 8 idi insayangkat dagiti nagtitipon nga elemento ti kapolisan a pakaibilangan ti Ilocos Sur Provincial Police Office nga indauluan ni Acting Provincial Director Senior Supt. Reynaldo Tamundong, Criminal Investigation and Detection Group (CIDG) Region 1, Special Weapons and Tactics (SWAT)-Region 1 ken PNP – Magsingal nga indauluan ni Chief of Police, Senior Inspector Arcadio Viloria.

Iti pannakaisurat daytoy, nakabalud ni Isaguirre idinto a maisagsagana dagiti kaso maikontra kenkuana.

Kabayatanna, tallo a drug personalities ti napilaan iti kaskaso kalpasan ti naballigi a search operations nga inwayat ti nagtitipon nga elemento ti kapolisan iti tallo a balay sadiay Magsingal, Ilocos Sur idi Marso 29.

Segun iti progress report manipud iti CIDGT Ilocos Sur a napetsaan Abril 4, pormal a napilaan ni Ryan Tolentino Oliver, 30, naasawaan iti sala ni Judge Marita B. Balloguing ti Regional Trial Court, Branch 24, Cabugao, Ilocos Sur iti kaso a panaglabsing iti RA 10591 ken RA 9165.

Iti kasona a panaglabsing iti RA 9165 a nai-docket ti CC No. 3406-KS, nairekomenda nga agpiansa ni Ryan Tolentino iti P200,000.00. Iti met kasona a panaglabsing iti RA 10591 a nai-docket iti babaen ti CC No. 3407-KS, nairekomenda nga agpiansa iti P60,000.00.

Napilaan met ni Minelio T. Oliver, 32, barangay kagawad, iti kaso a panaglabsing iti RA 10591 a nai-docket iti babaen ti CC No. 3404-KS ket nairekomenda nga agpiansa iti P80,000.00.

Kaso met a panaglabsing iti RA 9165 a nai-docket iti babaen ti CC No. 3405 ti naipila maikontra ken ni Jansen Costales Usana, 40, naasawaan, mannalon, ket napagpiansa iti P60,000.00.

Naruk-atan da Usana ken Minelio T. Oliver iti dayta met laeng nga aldaw agsipud ta naitedda ti piansada iti sala ni Judge Francisco Ante, Jr. ti MTCC, Vigan City, Ilocos Sur.

Temporario a nagtalinaed ni Ryan T. Oliver iti kustodia ti Magsingal Police Station bayat ti pannakauray ti pammilin ti korte mainaig iti disposision ti kaso.

Maipalagip a babaen ti bileg ti search warrants nga imet dagiti nagtitipon nga elemento ti kapolisan a pakaibilangan ti CIDG Ilocos Sur, PDEA, PAIDSOT, PPSC, Ilocos Sur PPO, PIB Ilocos Sur PPO, MARITIME, HPG ken Magsingal Municipal Police Station, sinukisokda ti balay ni Ryan Tolentino a nakakumpiskaanda iti maysa nga M16 baby armalite rifle (Elisco) nga addaan SN RP 049685 ken inserted magazine a nagkarga iti 26 bala; maysa a cal. 45 1911 pistol (Ranger) nga addaan magasin a nagkarga iti 7 a bala; maysa a long magazine para M16 rifle a nagkarga iti 4 a bala; 5 short magazine para M16; maysa a cal. 22 revolver nga awanan serial number a nagkarga iti 4 a bala; 2 bala para 12 gauge shotgun; maysa a medium size heat sealed plastic sachet a nagkarga iti mapapati a shabu; ken assorted drug paraphernalia.

Dua a search warrants ti naiwayat maikontra ken ni Barangay Kagawad Minelio Tolentino Oliver, Jr. a nagresulta iti pannakakum-piska ti maysa a cal 45 pistol (Taurus) nga addaan SN NFM 22309; maysa a cal 45 pistol (Colt) nga addaan SN 2741401; maysa a magazine assembly para cal 45 pistol a nagkarga iti 6 a bala; maysa a magazine assembly para cal 45 pistol a nagkarga iti 7 a bala; maysa a magazine assembly para cal 45 pistol a nagkarga iti 3 a bala; ken maysa a bala para cal 45.

Nakakumpiska dagiti polis iti balay ni Jansen Costales Usana, iti nadumaduma a drug paraphernalia.

Addaan ni Usana iti standing warrant of arrest gapu iti kasona a frustrated murder ken nakalista a No. 4 most wanted person ti Magsingal Police Station.

Nairaman a naaresto ni Frodelio Parbo Umani, 56, baro, gapu ta nasalamaan dagiti polis nga adda iti uneg ti balay ni Usana ken mapapati nga adda ikutna a drug paraphernalia.

Ngem dinismis ni Fiscal Maricel T. Bundoc ti kaso maikontra ken ni Umali gapu iti kaawan ti probable cause.#