Footer

Happy Graduation, Kunam?

Sinursuran:  Kolum ni Jobert M. Pacnis

(Umuna a paset)

 

MASIGURADOK, ka-Sinursuran, nangrugi metten dita lugaryo ti pannakayarkos dagiti nadumaduma a ladawan dagiti papili a lokal a kandidato. Tarpaulin, sakolin, kartolin wenno ania pay dita a mabalin a pakaibidaan ti ladawan ken gagemda itoy nga umay nga eleksion.

Ala, saankan a masdaaw ta nangrugi ngaruden ti panawen nga intuyang ti Commission on Election (COMELEC) a panagkampaniada. Umaydan agpadlaw– nupay nabayag met ketdin a nagpadpadlawda. Malagipmo idi Piesta Dagiti Natay, Paskua ken Baro a Tawen? Dimo ibaga a dimo nakita dagiti kablaawda kadagiti kalkalsada nga agingga ita ket addada pay dagiti dadduma? Immabot pay dayta itay Aldaw Dagiti Puso. Sa iti Marso, ti naespirituan(?) a mensaheda gapu ta panawen ti Samana Santa. Sa itoy Abril, agsasarutsot a kablaaw iti panagrikep ti klase babaen kadagiti nagdadakkelan a tarpaulin-da.

Amin dagita a panagpadlaw, tapno uray kaskasano, mabanniitanda ti kakaisuna a botosmo. Saan ketdin? Idi napan a tawen, adda kad’ kasta a pangablaawda? Awan a timmangken ta adayo pay met ti basingkawel.

Kakaisuna a botosmo, kunak? Ay, isuna laeng, a, no kabalinam ti mamindua wenno mamitlo nga agbotos!

Dinak iseman. Adu ti kasta, kunam sa! Uray ngarud dagiti nabayagen a naginana ket kabalinanda pay laeng ti agbotos!

Ikalukag dayta dagiti impluwensiado, dagiti nakatugaw iti takem a medio mapagduaduaan ti panangabakda tunggal panagpipili! Isuda dagiti di mangayat a mangibbet iti bileg a naipabulod kadakuada.

Nabartekda iti takem! Kasta ti rumbeng a pangawag kadakuada.

Ita a panagkakampania, saanmo metten a pagsiddaawan no kanayon a madisturbo ti panagsiestam. Uray pay kunaem nga addaka iti kasulinekan a paset, ket naulimek a tartaraknem ti impaunegmo, saan a didaka madanon dagiti agkakapigsa a jingle dagiti kandidato nga idandanon dagiti naarkila a traysikel, kalungkalong, multikab, ken dyip. Kurangna laengen ti pasagad ken karison!

Kadagiti kangrunaan a kalsada, ay, saan nga adayo a montero, van, wenno pajero ti akinkarga kadagiti sound system a mangibanbando kadagiti pamalbalatongda.

Pamalbalatong? Diak koma a sawen daytoy ngem isu ti agdadata a kinapudno, di met? Sawem man no addan natungpal dagita nga immay nangar-artiok iti botosmo kadagiti kallabes a basingkawel? Namin-anon nga inkarida a pasemento ti pagsungkaan a dalanyo? Ne, ket agingga ita isu pay laeng a pagsusungkaan. Immuneg ken limmmawa payen. Mano ti naanakanen iti dalan iti pannakaitaltagda?

Nakunak itayen a panawen ti pannakayarkos dagiti tarpaulin dagitoy a papili nga agserbi (kano) iti ilitayo. Adda intuyang ti COMELEC a pakaiplastaran dagita. Ngem ringudannak no matungtungpal dayta a pammilin/linteg.

Designated posting area? Awan dayta. Kaaduanna a kandidato itan ti awanan disiplina ket dida ikankano dagiti pagalagadan ti nadalus ken nakappapati nga eleksion. Mabistian latta dagiti poste ti kuriente, waiting shade, puon ti kayo ken alad/pader. No dika agalibtak, ay, baka pati pagtaenganyo, ipigketanda pay.

Apay nga awan ti maibalud, masuspinde kadagitoy nga aramid no talaga a maipawil?

Adu ti rason dagiti kandidato, sika met. Kas met laeng kenka, a. Ilibakmo pay a nakaawatka iti kuartada uray ulit-ulitem idi a kasta no maayusan ti makaulaw ‘ta karabukobmo.

Pudno nga adu ti linteg iti pagiliantayo. Ngem ti yanna nga adat, awan ngipen ti pannakaiwayatna. Maringringbawan iti tallo a G a kunada—guns, goons ken glory.

(Adda tuloyna)