Footer

Kaanonto a Mapaksiat ti Abu Sayyaf Group?

Salaysay ni Eden A. Alviar

 

NAPAPATAY dagiti 18 a kameng ti 44th Infantry Battalion ti Philippine Army kabayatan ti panangtambang kadakuada dagiti ginasut a kameng ti Abu Sayyaf Group sadiay Tipo-Tipo, Basilan kabayatan ti panangilagip dagiti Pilipino ti “Araw ng Kagitingan” idi Abril 9, 2016.

Maibasar kadagiti pakauna a report, mangisaysayangkat dagiti kameng ti Philippine Army iti operasion kontra kadagiti bandido idi maambus dagiti soldado. Mairaman kadagiti natay a soldado ti maysa a teniente, ken 17 nga enlisted personnel. Iti kaudian a report, agdagupen iti 31 a bandido dagiti napapatay kabayatan ti agtultuloy nga operasion. Maibilang kadagiti natay ket ni Mohammad Kattab, maysa a Moroko a terorista ken mapapati nga adda sadiay Mindanao tapno pagkaykaysaenna dagiti nagduduma a grupo ti terorista para ti panangitandudo ti Islamic extremism. Inaklon metten ti nagpaam-ammo a grupo nga Islamic State (Islamic State of Iraq and Syria) nga isuda ti nangilungalong dayta a panagambus. Ngem saan a kinompirmaran dayta ti AFP,

Naglak-am manen ti administrasion ti nakaro a kritisismo iti pannakapapatay dagiti 18 a soldado gapu ta dayta ti kaudian a pagteng a kaaduan ti bilang ti natay kalpasan ti trahedia a nagbanagan ti “Operation Exodo” sadiay Maguindanao idi Enero 25, 2015 a nakatayan dagiti 44 a kameng ti Special Action Force ti Philippine National Police tapno tiliwenda ti wanted a Malaysian a terorista. Nakaikuentro dagiti kameng ti SAF dagiti kameng ti Moro Islamic Liberation Army, Bangsamoro Islamic Freedom Fighter ken dadduma pay nga armado a  grupo.

Kas kadagiti pamilia dagiti napapatay a SAF 44 Commando, adda dagiti naulila dagiti napapatay a kameng ti 44th Infantry Battalion ti mangkritikar ti gobierno iti nagbanagan ti operasion. Sinarungkaranen ni Presidente Benigno Aquino III dagiti nakaospital a nasugatan a soldado. Nakipagladingit payen iti massayag dagiti sumagmamano a napapatay a soldado ket indanonna ti saranay ti gobierno kadakuada. Dimmawat isuna iti dispensar kadagiti pamilia dagiti naulila.

Kiniddaw dagiti naulila a pamilia ti pannakaipaay ti hustisia kadagiti natay a soldado babaen ti pannakapaksiat ti ASG tapno malapdanen ti terorismo nga isaksaknap daytoy a grupo. Ngem kaanonto a mapaksiat ti gobierno daytoy a terorismo a grupo a nagramut sadiay Basilan?

Bearer of the sword wenno para iggem ti espada ti kaipapanan ti balikas nga Abu Sayyaf. Daytoy ti nagan para gerra ti pundador a ni Abdurajak Abubakar Janjalani. Sabali pay a nagan ti grupo ket Al Haratul Islamia, tignay a mangisaknap ti Islam para ti agwaywayas a pagilian dagiti Moro sadiay Mindanao babaen ti Jihad wenno holy war. Binukel ni Janjalani ti grupo sadiay Tabuk, Isabela, Basilan, kaduana dagiti mannikigubat a Yakan ken Tausug a sigud a padana a kameng ti Mujahideen Commando Freedom Fighters a nakiranget kadagiti Soviet Army sadiay Afghanistan idi Dekada 80. Sinanay ida dagiti ahente ti Central Intelligence Agency ti United States of America ta madama pay laeng idi ti cold war-da ti sigud nga Union of Soviet Socialist Republic.

Bayat ti kaadda ni Abdurajak sadiay Afghanistan, nagayyemna dagiti kangrunaan a patron ken lider dagiti Taliban ken grupo nga Al Qaeda – daydi Osama Bin Liden ken Ramzi Yousef nga utek ti September 11, 2001 Terorist Attack sadiay America. Nagawid ni Abdurajak iti Basilan idi panawanen dagiti Ruso ti Afganistan, ket binukelna ti ASG babaen ti tulong a pondo da Bin Laden ken Yousef a naidalan iti maysa nga Islamic foundation.

Nadaras ti idadakkel ken ibibileg ti ASG. Adu dagiti nagkameng nga agtutubo a Muslim nga induron ti ideolohia ken pannakaallukoy iti pammati ti Islamic fundamentalism gapu iti kinapanglaw, kinakurang ti adal, ken gura kadagiti Kristiano ken iti gobierno. Nangrugi a naglatak ti ASG idi 1993 idi nagkidnapda kadagiti prominante a tattao sadiay Western Mindanao.

Idi 1994, sinangaili ti ASG iti Pilipinas da Yousef ken dagiti 24 nga international terrorist a nagpammarang a negosiante. Sinanay da Yousef dagiti napili a kameng ti ASG iti panagbomba tapno adda kaduada a mangisayangkat ti planoda a mangpapatay ken ni Papa Juan Pablo II kabayatan ti isasarungkarna iti Pilipinas para ti World Youth Day idi Enero 1995. Ngem natakuatan dagiti operatiba ti Philippine National Police ken Armed Forces of the Philippines ket napengdan ti plano. Natakuatan pay ti plano dagiti terorista a mangisayangkat ti “Oplan Bojinka” (loud explosion” nga aggigiddan a pannakapabettak dagiti komersial nga eroplano ti Estados Unidos. Natiliw pay dagiti ahente ti Federal Bureau of Investigation ni Yousef ken dagiti kaduana a terorista sadiay Pakistan.

Naglatak manen ti ASG idi Abril 4, 1995 idi nagpuor ken nagpapatayda kadagiti limapulo a sibilian iti poblasion ti Ipil, Zamboanga del Sur. Idi napapatay ni Abdurajak idiay Lamitan, Basilan kabayatan ti pannakirangetna kadagiti kameng ti 908th PNP Provincial Mobile Group idi Disiembre 18, 1998, simmukat kenkuana ti adingna a ni Khadaffy Janjalani. Nangrugin a nabingbingay iti nagduduma a paksion ti ASG.  Idi natiliw ken napapatayen dagiti dadduma a nagkauna a lider ti ASG ket ad-addan nga immadu dagiti paksion iti ASG.

Nagsasarunon dagiti terorismo nga insayangkat ti ASG nangruna ti kidnapping ken panagputolda ti ulo kadagiti hostage-da. Naglatak iti lubong ti grupo kadagiti insayangkatda a kidnap-for-ransom kadagiti ganggannaet a turista, misionario ken negosiante. Minilion a dollar dagiti mapapatin a nakolekta a ransom money dagiti ASG. Agingga iti agdama adda pay laeng dagiti kinidnap ti ASG ket dumawdawatda ti $1 Billion a ransom money. Agtultuloy met ti pananganup ti tropa ti gobierno kadakuada a gapu ti nakatayan dagiti 18 a kameng ti 44th Infantry Battalion ti Philippine Army.#