Footer

BANNER: Polis, pinaltoganna padana a polis; 2 pimmusay iti ospital

CAMP ELPIDIO QUIRINO, BANTAY, Ilocos Sur – Dua a polis ti Sigay Police Station ti naireport a natay idinto a nasugatan ti sabali pay a kaduada idi pinaltogan ida ti padada a polis bayat ti panangrabiida iti uneg ti estasionda idi Abril 10.

Iti report manipud iti Sigay police station, pinaltogan ni PO1 Rowell Paragas y Munar dagiti kakaduana a polis bayat ti pannangan dagitoy idi agarup 8:20 ti rabii ti Abril 10.

Naitaray da NUP Mark Jay Barrientos y Cerna, SPO2 Leborio Dangalen, ken SPO2 Gilbert Rabang  iti Candon City Hospital ngem pimmusay da Barrientos ken Dangalen bayat ti pannakataming dagiti sugatda.

Naideklara nga awanen ti peligro iti biag ni Rabang.

Kas maibatay iti blotter, idi agarup 8:15 ti rabii ti nadakamat a petsa, napan inayaban ni Rabang ni Paragas a mangrabiidan.

Simmurot ti suspek ken ni Rabang a nakaiggem iti isyona a paltog ket idi makaasideg iti lamisaan, kellaat a pinaputokanna dagiti padana a polis a nakasugatan dagitoy malaksid ken ni PO1 Leo Aoay y Prado a nangisuyo iti bagina iti sirok ti lamisaan idi nagpaputok ni Paragas.

Mapapati nga agpaputok koma pay ti suspek ngem  nag-jammed ti paltogna.

Ginundawayan dayta ni Rabang ket kinagubalna ni Paragas agingga a naagawna ti paltog.

Nagtaray ni Paragas ngem kinamat dagiti padana a polis sada tinengngel ken impisok iti pagbaludan.

Malaksid iti paltog a nabati ti suspek, nakarekobre dagiti inbestigador manipud Crime Laboratory Group ti Ilocos Sur PPO nga indauluan ni PCI Leonardo Q. Arce iti sangapulo ket maysa a naiputok a cartridge cases manipud iti 9MM a pakairamanan ti 3 a buli, 2 a deformed slugs ken 3 a metallic jackets.

Iti pannakaisurat daytoy, saan pay nga ammo ti motibo ti pammaltog ngem naalaanen  iti urine sample ken naipababaen iti paraffin test ni Paragas.#

Comments are closed.