Footer

BANNER: Campaign rally, nabuak gapu iti napabettak nga eksplosibo

CERVANTES, Ilocos Sur – Nairanta a pangriribuk ti pannakapabettak ti maysa a eksplosibo bayat ti campaign rally sadiay Sitio Camay, Barangay Comillas North ditoy nga ili idi rabii ti Abril 20?

Daytoy ti anggulo a kitkitaen dagiti inbestigador iti agtultuloy a panagimbestigada mainaig iti nasao nga insidente a nangbuak kadagiti residente a dimmar-ay iti nasao a campaign rally.

Nupay awan ti naireport a nadangran wenno sanikua a nadadael, nagkiddaw ti kapolisan ditoy iti dua a team manipud iti  RPSBI 2nd Man Coy a nakabase iti Barangay Rosario, Cervantes tapno maalay-ayan ti panagamak dagiti umili.

Nangipasdekda metten iti checkpoint iti Sitio Guitlangan ken Sitio Camay, agpada a sakup ti Barangay Comillas North, Cervantes para iti posible a pannakatiliw dagiti nangisayangkat iti panagpabettak.

Mismo a ni Mayor Benjamin Maggay ti nangireport iti kapolisan ti napasamak a panagpabettak iti eksplosibo bayat ti rali iti nadakamat a sitio.

Naammuan iti inisial nga inbestigasion a madama ti panagbitla ni dati a Vice Mayor Robert Harnois idi adda nangeg a napigsa nga eksplosion sumurok-kumurang 60 a metros ti kaadayona iti nakaangayan iti campaign rally.

Iti panaginspeksion dagiti polis, nasarakanda ti maysa nga abut nga agarup lima a pulgada ti kalawana ken agarup dua ket kagudua a pulgada ti kaunegna  iti asideg ti maysa a kaimito.

Nupay kasta, kas maibatay iti kapigsa ti eksplosion, mapattapatta a maysa nga improvised explosive device ti pinabettak ti di pay am-ammo ti tao.

Agtultuloy ti panagimbestiga dagiti polis ditoy a mangammo no asino ti nagpabettak iti eksplosibo a nangwara iti campaign rally.#

Comments are closed.