Footer

Dagiti Natuok nga Aldaw ni Maestro Teody

Sarita ni Jobert M. Pacnis

(Maudi a paset)

 

Nagpagnapagna ngarud ni baketna iti sanguanan ti RHU nga agatiddog iti agarup duapulo metro. Pasaray idiretsona iti likud sa rummuar iti bakrang. Pagsammakedan ni baketna no kasta nga agsikal ti tianna.

Isu pay laeng ti pannakarikna ni Maestro Teody iti bisinna. Saan pay gayam a nagmerienda idinto a pangngaldaw payen.

“Ania ti kayatmo a makan, ‘Mang?” sinaludsodna ken ni baketna.

“Diak makakakkakaan,” insungbat daytoy.

“Mapanak man ngarud gumatang iti masaramsam,” impakadana.

“Panawannak a kastoy?” ta pagammuan ta naikiraud a sungbat.

“Apagbiitak laeng, ‘Mang.”

“Dinak panawan kunak! Awan kaduak! Di met laengen sumangpet da mamang.”

Nakudkod laengen ni Maestro Teody ti ulona. Awan met laengen nga agpayso da katu-ganganna nga itay pay agrubrubbuatda idiay balayda a tineksanda. Sabagay, agarup duapulo minuto a tarayen ti tryasikel ti barangayda. Baka addada ‘diay talon ket saanda a dagus nabasa ti text.

Limed a napayaman ta adda limmabas iti sango ti health center ti nakamotorsiklo nga aglaklako iti siopao. Gimmatang iti dua. Ngem di kinayat ni baketna. Kapilitan a kin-nanna. Napedped ti bisinna.

Intuloyda latta ti nagpagnapagna kalpasanna. Ngariet a ngariet ni baketna a mangsar-sarapa iti tianna.

“Apoow, apooww, ‘Pang…” iyasug pay daytoy. “’Intan dita kuarto, kayatko a yidda.”

Apagserrekda, sinaruno a dagus ida ti dua a nurse ken maysa a midwife. Binayabayda nga inserrek iti delivery room.

Rimmuar ni Maestro Teody iti kuarto. Isu met a sumungad dagiti katuganganna.

“Komustan?” magagaran ti katuganganna a babai a nagdamag. Sumagpat a singkuen-tanan ngem ipatom nga agsisentanan ta naturtor iti trabaho iti talon. Maitugotan ti danag iti rupana.

“As-asikasuenda dita uneg, ‘Nang,” kinunana.

Nagurayda iti ruar. Intugawda  iti bangko a nanglawlaw iti sementado a kuadrado a lami-saan iti paraangan ti RHU.

Saan a makaidna ni Maestro Teody. Pagna a pagna iti aglawlaw. Nasuroken a maysa oras manipud itay inserrekda ti asawana iti delivery room ngem awan met laengen ti rummuar kadagiti nurse ken midwife. Mangrugin a karayaman ti danag. Kadagiti dua nga annakda, arig apagserrek laeng ti baketna iti delivery room, rimmuaren dagitoy. Kasla napan laeng nagibleng, kuna dagiti sutil a midwife.

Talaga a mariknanan ti kettangna. Dina pay gayam pinadas nga inyinana. Wenno pinagtalna ti bagina.

Kasano ngatan dagiti adalanna? Awan ngata met laeng iti nagaapa? Inubrada ngata dagiti trabahoda? Bareng…  Dayta met ketdi ti sangkakunana kadakuada. Dida panawan dagiti area-da a di madalusan. Aglalo ket estrikto ti prinsipalda iti panamagtalinaed ti kinadalus ti aglawlaw. Dina la kayat ti may-ayaban iti office gapu laeng ta narugit ti area-da. Isuna laeng ta no sumro a talaga ti kinasutilda, maibus ti pasensiana iti kakaanawa ken kapamagbaga. Mauma pay ketdin no maminsan.

Pinardasanna nga inasitgan ti nurse a rimmuar iti kuarto. “Komustan, ma’am?” sinalud-sodna. Simmaruno gayam kenkuana dagiti katuganganna.

“Nakaruaren, sir,” insungbat daytoy.

Nakaanges iti nalukay. Nakitana pay ti ilalawag ti rupa ti katuganganna a babai idinto a kalmado laeng ti katuganganna a lalaki.

“Ngem saan pay ti kadkadua,” insaruno ti nurse.

“Ne, apayen, mam?” ti met babai a katuganganna ti nagdamag.

“Narigatan a nagpasngay ni misis ta napulipolan ti tengnged ti ubing. Pinutedmi a dagus dagiti nangbekkel kenkuana apaman a rimmuar ti ulona ta madlaw a lumitemen. Isu siguro a naitantan ti isasaruno koma ti kadkaduana a rimmuar. Sige, anti, ta adda pay tawagak.”

Nagkikinnitada. Ngem awan ti nagtimtimek. Kasda la naidarekdek. Intugawda lattan kadagiti bakante a monoblock iti sango ti Information table nga abay laeng ti kuarto ni baketna.

Kalpasan ti duapulo minuto, maysa a nurse ti dimteng. Isu gayam ti tinawaganda ta eksperto kano daytoy iti kaso a kas iti kaso ni baketna.

Sangapulo minuto ngata pay ti napalabas idi rummuar met laeng ti nasao a nurse. “No di pay rummuar kalpasan ti maysa nga oras,” kinunana kadakami, “itaraytayon ‘diay emergency ta ma-caesarian.” Ti district hospital ti kayatna a sawen.

Nagkikinnitada manen. Caesarian? Kadkadua laeng, mabutiakan pay? nasaludsod ni Maestro Teody iti bagina.  Uray ospital ti gobierno ti emergency, dakkel la ketdi latta ti magastos. Iti ammona, awan ti siruhano iti emergency. Mangay-ayabda kadagiti private practitioners wenno kadagiti pribado nga ospital iti kabangibang nga ili. Namak payen no itarayda pay idiay Tuguegarao?

Napaanges iti nauneg. Pangalaanna ngata ti gastuenda? Saan payen a maka-anay ti mabatbati a sueldona nga allowance-da iti makabulan. Dakkel ti nautangna iti panangipatakderna iti bungalow a balayda.

“Napanen… napanen!” naatiag ti panagpampanunotna iti ragragsak dagiti adda iti deli-very room.

Madamdama, rimmuaren ti midwife. “Mabalinmon a mapan kitaen dagiti agina, sir,” kinuna daytoy kenkuana. “Congratulations!”

Napatangad. Nagyaman a sipapasnek.

Sinaruno dagiti katuganganna iti iseserrekna iti kuarto. Addan nga agpayso dagiti aginana iti kamada. Binisitona dagitoy.

Panagriknana, kasla naunas a lugit dagiti kettangna a nagmalmalem. Maysa manen nga anghel ti simmangbay iti biagda nga agassawa. Ad-adda manen ita nga ayatenna ti trabahona.  Uray pay nasapa a pagubanen dagiti ubbing nga agdalan kenkuana.#

Comments are closed.