Footer

EDITORIAL: Dagiti Pagpilian a Para Senador ken Partylist Group

NAIKEDDENG ngatan dagiti botante no sino dagiti butosamda manipud Presidente agpababa kadagiti kameng ti Sangguniang Bayan wenno Panglunsod?

Dua a lawas laengen sakbay ti eleksion inton Mayo 9, 2016 ket masapul a dagiti botante no saanda pay a nakaikeddeng kadagiti butosanda ket addan dagiti karkarapenda wenno addan listaan dagiti ibutosda. Nasken daytoy ta no saanton nga agbaliw ti pangngeddengda ket madadaanton nga adda pagbasaranda.

Nalaklaka ti agpili kadagiti para presidente ken para bise presidente ta bassit dagiti kandidato, ken dagiti dadduma a lokal posision ta adda pay dagiti probinsia, distrito, ili ken siudad a dagiti kandidato ket awan pulos dagiti kasalisalda wenno un-opposed candidates.

Dakkel a problema ket ti panagpili dagiti kandidato a para senador. Nagadu dagiti kandidato a para senador  ngem sumagmamano met laeng a nagan dagiti mangmangeg iti radio, mabuybuya iti telebision wenno mabasbasa kadagiti pagiwarnak ken magasin. Bassit met ti bilang dagiti senatorial candidates a nawaras dagiti poster ken tarpulinda a maiplasplastar kadagiti publiko a lugar. Dagiti met laeng kandidato a dakkel ti pondoda ti makabael kadagiti adu a political advertisements ken campaign materials. Adun dagiti kandidato a maikamkampania iti social media ngem adu pay met laeng a botante dagiti saan nga agar-aramat itoy a baro a wagas ti media.

Napateg dagiti political advertisements ken campaign materials dagiti kandidato tapno mapakaammuan dagiti botante ti panagkandidatoda, ti kinatao, kabaelan ken programa ti gobierno no mangabakda. Uray no kasano ti kinasayaat ti kinatao, kaadu ti nagapuanan, ken kinaimbag ti programa ti gobierno ti maysa a kandidato no saan met nga ammo dagiti kaaduan a botante, ket awanto met laeng ti mamaayna. Uray met no dakes ti kinatao, awan ammo ken naaramidanna, ken awan ti nalawag a programa ti gobierno ti maysa kandidato no nalatak ken adda pakaikappenganna a napigsa a makinaria ket sigurado ti panangabakna.

Rumrummuar kadagiti kadagiti kangrunaan a survey a kaaduan kadagiti adda iti sangapulo ket dua a kangatuan a kandidato ket dagiti nalatak nga agdama wenno sigud a senador, agdama a kongresista wenno sigud a kameng ti gabinete ti Presidente. Mapaliiw nga adu kadagiti nababbaba ti puestoda iti survey dagiti nalimed nga adu dagiti nagapuananna ken mabalin nga adunto pay ti maaramidanto para ti pagimbagan dagiti kaaduan nga umili. No pumaysanto dagiti survey, sigurado a kaaduanna dagiti kabarbaro a mabutosan a senador ket dagiti met laeng sigud ken nabayagen a rupa nga awan met ti naindaklan a naaramidanda para ti pannakapadur-as ti kasasaad dagiti kaaduan nga umili.

Problema pay ti panagpili kadagiti rumbeng a butosan a partylist group. Umad-adu met dagiti pagpilian a partylist group ket saanen a masinunuo no ania kadakuada ti kasayaatan a mangirepresentar ti sektor wenno grupo a pakaibilangan ti maysa a botante. Iti pannakaikampania dagiti partylist group ket saanen a ti grupo a maireprepresentar ti sentro ti kampania, ngem no sino dagiti nainominar wenno nominado a mangirepresentarto ti grupo iti House of Representative.

Mapaliiw nga adu kadagiti nominado dagiti partylist group ket nagtaud met laeng kadagiti nalatak ken nabileg a pamilia dagiti politiko. Imbes a dagiti partylist group ket instrumento tapno mairepresentar dagiti maipapaigid a sektor dagiti umili, ngem nagbalinen daytoy a wagas tapno ad-adda pay a lumawa ti masakupan a posision dagiti karaman kadagiti political dynasties.

Rumbeng a dagiti botante ket pilienda a nasayaat dagiti ibaonda iti Senado wenno partylist group tapno saan a masayang dagiti botosda ken dagiti buisda a gasgastosen dagiti agtugawto a senador ken kongresista no mangabakda iti eleksion.#

Comments are closed.