Footer

Lalaki, pinilidan manmanehuenna a dyip

CABUGAO, Ilocos Sur – Nagkas-ang ti napasamak ti maysa a drayber agsipud ta ti mismo a manmanehuenna a dyip ti nangpilid kenkuana a puon ti nakatayanna.

Saanen a naiyabot a sibibiag iti Pira Clinic and Hospital ni Oscar Quilonio y Dela Cruz, 67, naasawaan, ken residente iti Barangay Bongtolan, Vigan City, Ilocos Sur gapu kadagiti sugatna iti nadumaduma a pasetna gapu iti pannakaatalna.

Segun iti kadua ni Quilonio a ni Jonathan Patao y Tallar, 50, naasawaan, ken residente iti Barangay Balaleng, Bantay, mapapati a bayat ti panangimaniobra ti biktima iti pampasahero a dyipna iti salogan iti las-ud ti maysa a bakante a lote  iti Barangay Turod Patac idi agarup 6:05 ti malem idi Abril 15, nadlaw ni Quilonio nga adda diperensia ti under chassis ti dyip ket insardengna ti lugan sa dimsaag a saannan nga iniddep ti ignition switch sana sinirip ti under chassis.

Ngem nagsalog ti dyip ket naatalan ti biktima a naglak-amanna kadagiti serioso a sugat iti nadumaduma a paset ti bagina a puon ti nakatayanna.#