Footer

Tapno Dumur-as Metten ti Pagilian

Sinursuran:  Kolum ni Jobert M. Pacnis

(Maikadua a paset)

 

Akuen talaga ti COMELEC a marigatanda a mangkaso kadagiti aglabsing a politiko. Agpatinggada lattan a mangdagdagulit iti telebision, radio ken pagiwarnak a maaddaan koma dagiti kandidato iti delikadesa.

Delikadesa? Sika man ti saludsodek, ka-Sinursuran. Addaanda kadi dagiti papili, kandidato iti dayta?

Isu a dikan masdaaw no adu latta ti marmaruam nga aglabsing. Maruamtayon. Ta agingga a di agrangpaya ti bukod a disiplina iti puso, kananakemtayo, awanto latta ti serserbina dagiti adu a linteg iti pagiliantayo.

Mayatka iti kunak, ka-Sinursuran?

Namnamaem metten nga agpipinniltak dagiti kandidato. Uray below the belt a kunada, sige latta. Ti napateg, adda maipalapalda a pitak ti kalabanda a mabalin a pakadismayaan dagiti mabalin a mangbotos kadagitoy. Ket di kad’ nasayaat no isuda a nagpalapal ti mabotosan!

Ngem saan lattan a matmaturog ti bangir. Siempre, pumalapal met. Nakarkaro pay! ket ditoyen a bumara a bumara ti basingkawel!

Paseten dayta ti politika iti pagiliantayo. Adu ti agruar nga isyu maipanggep kadakuada a papili. Makali uray personal a kabibiagda. Mano ti putotda iti ruar, mano ti kakinkinnu-dalsingda… ay, awan dulianan dagiti nangednged ti pasensiana. Mairubo a dina oras.

No dika makalawlaw ti kelleb, ibagbagak kenkan, saanka laengen nga agkankandidato. Tumangadkanto la ngata iti barsanga a dina oras.

Ammom kadi a makael-ellekak iti istilo dagiti dadduma a kandidato? Ngem bentahe dagiti adda luganna aglalo kadagiti agpaspasada. Agasem, maarkosan iti tarpaulin ti nadumaduma a kandidato ti luganda. Uray asino, basta agbayad, ayos daytan. Agasem met ngamin dayta bayoleta a maited?

Saanmon a malasin no akinlugan ti masabatmo ta napalawlawanen iti nadumaduma a rupa dagiti kandidato.

Simple a panaggatang iti botos, saan ketdin?

Daytoy pay. Agpa-assembly meeting-da iti barangay. Tapno adu ti mapan, maikissiim nga adda maiwaras a sardinas, payless, tuyo ken merienda kadagiti dumar-ay. Inton adda kan’ iti barangay hall, makitam metten dagiti kandidato a pasalsali. Sa maammuam nga isuda gayam ti agpamerienda ken nagtaudan dagiti taraon a maiwaras.

Simple manen a panaggatang iti botos, di ngamin?

Gapu ta medio naiget ita ti COMELEC, awan unay ti pumappapel a politiko iti panagturpos dagiti ubbing. Mayat met tapno dida a makuna nga ‘epal.’ Ngem ti manen pakakatawaak, adda ‘tay politiko a mangikarkari iti iskolar kadagiti amin nga adda iti hayskul. Agarup dua ribu amin nga ubbing dayta. Uray pay makuna a libre itan ti panagbasa, adda met latta bayadan dagiti adda iti pampubliko a pagadalan. Ditoy deppaar nga ayanko, mapan a P400-P600 dayta iti makatawen. No kuentaem, mano daytan a bayadan dayta a politiko iti tinawen?

Mano kadi ti sueldo ti konsehal ti ili? Nagsimple a Matematika dayta. Tapno makasubbotto, siempre, adu a binuburiong ti aramidenna inton agtakem. Kakaasitayto manen. Ania pay ngarud!

Kangrunaan pay a mapaliiwmo, dagiti di mayat nga agpasublat iti takem. Political dynasty, kuna dagiti dadduma. Ngem no damagem met dagiti maseknan, timek kano met dagiti umili ti mangipatugaw kadakuada iti trono. Saanda kan’ met a pinilpilit ida. Ket gapu ta addatayo iti demokrasia a pagilian, ti timek ngarud ti kaaduan nga umili ti masurot. Kasta ti kayatda a paruaren.

Ngem no anagem a naimbag, rasonda laengen dayta ta dida kayat nga ipasublat ti takem. Saanda a kayat a masilawanto ti pudpudno nga aramidda inton sabali ti adda iti pagtugtu-gawanda. Ania, agtugtugawdanto iti pagbaludan iti nabatbati pay a panawen ti biagda? Saan pay laeng! kunada, a.

Isu nga uray di maikanatad nga aramid, mapasamak. Masigurado la ketdi ti saan a pannakaibbet ti takem.

Estratehia ti tunggal kandidato amin dayta a makitkitam. Aramidenda amin a kabaelanda tapno sigurado laeng ti panangabakda. Saan ngamin nga asi-asi ti gastosda tunggal eleksion.

Ngem pangngaasim koma ta siertom no pakaitaklinan ti kakaisuna a botosmo. Saanmo a lalaokan iti binuburiong, binabagtit ti panagpilim.

Tapno dumur-as metten ti pagilian!#