Footer

Kaibatogan a Lubong

Sarita ni Salvador A. Espejo

(Umuna iti dua a paset)

 

“AGKASARAK inton agtapus, manong. Umayka, wen? Awisemto ni Manang Vicky. Padaanandakayo.”

Naggapu ti tawag ken ni Lilibeth, ti bugbugtong nga anak ni Ikit Desta. Siak ti nangpaadal ken ni Lilibeth. Nagturposen iti kinamaestra ket mangisursuro iti awaymi.

Nagliadak iti tugawko. Nagpardasen ti panagtulid ti panawen, naisipko. Agbutbuteg laeng ni Lilibeth idi pumanawak iti lugarmi sangapulo ket liman a tawen ti napalabas. Tallopulo ket limakon.

Nalagipko ti away a pinanawak, ti panagubingko ken dagiti arapaap nga inabelmi – ken ni Milagros. Mano ngatan ti annakna?

Intalmegko ti interkom ket inawagak ti sekretariak. Pinakanselak dagiti appointmentko inton agtapus.

Dinagasko ni Vicky iti M & M Marketing a pagpapaayanna a kas accountant.

Binuyami ti itatabon ti lumabanag nga init iti baybay ti Manila. Nangrabiikami iti maysa a nalatak a panganan iti Siudad ti Makati. Alas onsen idi agawidkami.

“Agkasar ni Lilibeth,” nakunak. “Agpaprobinsiaak. Dua nga aldaw nga awanak.”

Nagsayangen ta nabuntuonanak iti trabaho,” kinuna ni Vicky.
Umayak koma met. Kayatko a makita ti away a dimmakkelam.” Dimmenden. “Kaanonto met ti panagsimpata?”

“Matektekankan?”

“Tallon a tawen nga agayan-ayatta. We’re not getting younger, you know.”

Diak nagtimek. Diak ammo no apay a ni ketdi Milagros ti simmallin iti panunotko.

ADDAKAMIN iti maudi a tukad ti sekundaria idi masangal ti ayan-ayatmi ken Milagring.

“Agbalinakto a nalatak nga abogado,” nakunak. “Siakto ti sadiri dagiti kapurokantayo.”

Ngem naaksidente dagiti dadakkelko iti naminsan a panagudongda. Innalanak ni Ikit Desta. Ngem marigrigat ni ikit ket kapilitan a nagsardengak. Tinalonko ti sangkakelleng a tawidko. Ngem nakisang ti tudo ket natikagan dagiti kataltalonan. Awan ti naapitko. Inkeddengko ti makigasanggasat iti siudad.

Nagsangit ni Milagros idi maammuanna ti panggepko.

“Simple laeng ti arapaapko iti biag, Ador,” kinunana.

“Diak kayat a maramanam ti rigat iti dennak,” nakunak.

Nadumaduma a pagsapulan ti sinerrekko iti siudad. Nagkargadorak iti pier. Nagugasak iti pinggan iti restauran. Nagbalinak nga stay-in helper iti pagtagilakuan iti lansa ken landok.

Ditoy ti nakaam-ammuak ken Tata Bernan. Idi naammuanna ti reggetko nga agbasa, innalanak a dianitor. Pinalubosannak nga agadal iti rabii. Papetpetannak pay iti para gastosko iti pagadalan. Komersio ti inadalko.

Idi nagturposak, maysaak kadagiti napadayawan. Inrekomendanak ni Tata Bernan iti kompadrena nga executive iti maysa a nalatak a construction firm.

Natalgeden ti pagsapulak, naisuratko ken ni Milagros. Ngem aganusta pay. Kayatko nga ituloy ti agbasa iti kinaabogado, kinunak.

Agyamanak iti Dios ta asidegen ti pannakatun-oymo iti arapaapmo, insungbat ni Milagros. Ikarkararagko ti panagballigim.

Ngem iti panaglabas dagiti tawen, rimmasay dagiti surat ni Milagros. Diak metten sinursuratan gapu iti kaadut’ tamingek iti opisina ken maringgorannak nga agrepaso iti eksamen. Maawatannak ni Milagros, nakunak iti nakemko.

Anian a ragsakko idi mairuarko ti bar. Siak ti maikapat! Nagsuratak a dagus ken ni Milagros. Dinak sinubalitan.

Naammuak laengen ken ni Lilibeth a nagkasaren ni Milagros. Ni Cardo a kalugaranmi ti nakiasawaanna. Kasla nagrisud ti langit kaniak.

AGKARADAPEN ti sipnget idi ipaigidko ti kotsek iti sanguanan ti balay ni Ikit. Bunggalo ti balayna. Dakkel ti naitulongko iti pannakapapintasna.

Timman-aw ni Lilibeth. “Addan ni manong!” Sikakaranting a simmabat. Kinusokusok ti buokna.

“Ni Manang Vicky, manong?” inamad ni Lilibeth.

“Adu ti trabahona,” insungbatko.

Nagsaninglot ni ikit Desta idi arakupennak. Inyam-ammo ni Lilibeth ni Ben a nobiona. Naragsak a kasarsarita ni Ben.

“Kumusta ni Milagros, ikit?” sinaludsodko idi duduakamin iti salas.

“Tallon ti annakda ken Cardo,” insungbat ni ikit. “Awan ti nagluposan ti panagbiagda.”

Kasla nasudak ti pusok.

(Maigibusto)

Comments are closed.