Footer

Lokal nga opisial iti Ilocos Sur: solido a butos ti Solid North, maited ken ni Poe

VIGAN CITY – Agtrabtrabaho dagiti lokal nga opisial iti Ilocos Sur a mangited iti solido a butos para ken ni Senadora Grace Poe.

Daytoy ti kinuna ni Diputado ti Ilocos Sur First District Ronald Singson bayat ti campaign sortie ni Poe ditoy siudad idi Abril 26.

Kinuna ni Singson a popular ni Poe kadagiti lokal nga opisial ket ar-aramidenda amin a kabaelanda tapno maited ti butos ti Solid North ken ni Poe iti eleksion inton Mayo 9.

Kinuna ni Singson a dayta ti ur-urnosenna agsipud ta nainbolbaren iti kampania ni Sen. Grace Poe idinto nga innayonna a nagpapatangdan iti pamiliana no maideliberda ti butos ti Solid North ken ni Poe.

Segun iti diputado,  umun-una ni Poe kadagiti surbey iti distritona babaen ti 37 a porsiento, sarsarunuen da Vice President Jejomar Binay a nakagun-od iti 26 porsiento ken ni Davao City Mayor Rodrigo Duterte nga nakagun-od met iti 24 porsiento.

Nupay kasta, naulimek ni Governor Imee Marcos no sino ti iyendorsona para presidente idi bimmisita ni Poe iti Ilocos Norte.

Ngem natibong ti tandem a Poe-Marcos iti nasao a probinsia iti baet a ni presidential candidate Senator Miriam Defensor Santiago ti katiket tu kabsat ti gobernadora a ni  Senator Ferdinand “Bongbong” Marcos, Jr.  a kandidato para bise presidente.

Kinuna ni Singson nga inkarin dagiti kaaliadona iti umuna a distrito ti Ilocos Sur ti suportada ken ni Poe.

Kinuna ni Singson nga iti daytoy a panawen, agbaliwbaliw dagiti surbey no sino ti mangabak a presidente, ngem ti makunana ket daytoyen ti panawen tapno agpilitayo iti presidente.

“Ipuestotayo ti presidente a kabaelanna nga idauluan ti pagiliantayo,” paset ti bitla ni Singson bayat ti rali a naangay iti Vigan City Convention Center idi Abril 26 sana innayon a para kenkuana, “awanen sabali no di ni Senator Grace Poe ken ti Gobiernona nga addaan Puso, agsipud ta iti panagkitana, isu laeng ti addaan kabaelan a mangpataray iti gobierno a mangdengngeg kadatayo amin”.

Kabayatanna, kinuna ni Poe nga iprioridadna dagiti proyekto inprastruktura iti rehion kas iti upgrading ti airport ken seaport tapno ad-adu pay ti maawis a turista.

Kinuna ni Poe a no mangabak iti eleksion, putden ti gobiernona ti saan a nasayaat a pannakaaramat ken naladaw a pannakaruk-at ti bingay iti excise tax ti industria ti tabako.

Kinuna ni Poe nga arungaing dagiti lokal nga opisial, a kasapulan pay nga agpakpakaasida iti gobierno tapno maited daytoy (bingayda iti excise tax ti tabako).

Madakamat ditoy a ti Ilocos Sur ti kadakkelan iti produksion iti tabako  nga aganay a 75 porsiento iti produksion iti sibubukel a pagilian.

“E pera naman talaga ninyo ‘yon sapagkat nasa buwis ‘yan e. Nakalaan ‘yan talaga para sa inyong probinsya. Kaya ‘pag ako ang pangulo, walang ipitan sa mga ganyan,” kinuna ni Poe.

Tallo a rehion ti mangbukel iti makunkuna a Solid North, ti Region 1 wenno ti Ilocos Region, Region 2 wenno Cagayan Valley ken ti Cordillera Administrative Region (CAR).

Addaan kadagupan 5.7 milion a  rehistrado a botante dagiti tallo a rehion. Ditoy Ilocos Sur laengen ket adda nasurok a 400,000 a rehistrado a botante.#