Footer

Agbatbatek iti Kalinga, karaman naitampok iti art exhibit idiay Canada

KALINGA – Maysa a baket nga agbatbatek iti naseksek a lugar iti kabambantayan ti Tinglayan ditoy a probinsia ti nairaman a naitampok iti art exhibit iti maysa a museo sadiay Canada.

Naitampok ni Whang-Od Oggay, maysa kadagiti kabaketan a hand-tapped tattoo artist manipud iti Buscalan, Tinglayan, Kalinga, bayat ti art exhibit iti Royal Ontario Museum, Toronto, Canada agpaut  agingga iti Septiembre 5 daytoy a tawen. Nagbiahe ti art exhibit manipud iti Musee du Quai Branly iti Paris.

Kangrunaan a panggep ti art exhibit ti pannakaitampok ti bisual a pakasaritaan ken ebolusion ti panagbatek iti las-ud ti lima ribu a tawen a nakaitampokan ti visual a historia ti arte iti bagi ken maldit, dagiti kadaanan a ramit a naaramat iti panagbatek, ken ti nakomision a natato a silicone body reproductions nga intato dagiti maraem ken nalatak a agbabatek iti lubong.

Maysa ni Oggay kadagiti naitampok a tattoo artist iti nasao nga exhibit a pakaibilangan pay dagiti nalalaing a tattoo artists a kas kada Tin-Tin (France), Horiyoshi III (Japan), Filip Leu (Switzerland), Paul Booth (USA), Chimé (Polynesia), and Yann Black (Montreal).

Nalatak a tattoo artist ni Whang-od Oggay, 98, gapu kadagiti orihinal  a panagbatekna babaen iti duog a wagas a daydaywen mismo uray dagiti ganggannet iti pagtaenganna sadiay Buscalan, Tinglayan, Kalinga, tapno mapabilang a koleksionda ti batek ti baket. Agar-aramat ni Oggay iti siit manipud iti sua ken kawayan a patitpatitenna iti panangimalditna ti daan nga arte iti bagi ti agpatato.

Naglatak ni Oggay gapu dagiti binatekanna, nangruna dagiti ganggannaet a nangiposte iti Facebook ti kapadasanda a nagpabatek kenkuana.

Idi napalabas a tawen, nairusat iti online ti maysa a petision para iti pannakaideklara ni Oggay a kas national artist.

Segun dagiti nangsuporta iti petision, maysa a porma ti arte dagiti tattoo ket pagtalta-linaeden ni Whang-Od a sibibiag ti historia babaen iti panagbatekna. Kinuna pay dagiti mangraraem iti baket a no mapadayawan ni Whang-Od kas national artist, bigbigen met ti pagilian ti nabaknang ngem agpukpukawen a kultura dagiti taga-bambantay.

Ngem kadagiti dadduma a netizens, saan laeng a kas national artist ti pakapadayawan koma ni Whang-Od no di ket kas National Living Treasure.

Babaen ti Republic Act No. 7355, nabuangay ti sabali a sistema ti gunggona para kadagiti kalaingan a tra-ditional artists ket naawagan iti Gawad sa Manlilikha ng Bayan wenno National Living Treasures Award.

Iti agdama, sangapulo ket tallo pay laeng dagiti napadawayan kas National Living Treasures manipud iti nadumaduma a paset ti pagilian.

Idi 2012, napadayawan ni Magdalena Gamayo ti Lumbaan, Pinili, Ilocos Norte a National Living Treasure. Nupay agtawenen iti 91, agab-abel pay laeng ni Gamayo.#