Footer

Pagtagilakuan, natakawan iti DVD players

CANDON CITY – Tagilako a DVD players ti naipuslit ti maysa a grupo dagiti babbai manipud iti maysa a pagtagilakuan iti Barangay San Juan ditoy siudad idi malem ti Mayo 5.

Inreport ni Margaret Padilla Halig, 23, awanan asawa, manedier ti People Star General Merchandise ken residente iti Barangay Santa Monica, Agoo, La Union a natakawan ti pagtagilakuanna iti DVD players a mapapati a naipuslit idi malem ti Mayo 5.

Naduktalan ti panagtakaw bayat ti panagimbentario ni Mark Anthony Iñego, in charge kadagiti appliances, idi agarup 4:00 ti malem iti dayta a petsa.

Dagus nga inreport ni Iñego iti manedier a mapukpukaw ti pito a  Pensonic DVD  players manipud iti nakaidispleyanda.

Pinarebio ni Halig ti CCTV camera a nayinstolar iti pasdek ket kas maibasar iti footage, maysa a grupo ti di nabigbig a babbai ken lalaki ti nangisayangkat iti panagtakaw.

Kas maibatay iti CCTV footage, nakapalda dagiti babbai ket inkabilda dagiti DVD players iti nagbaetan ti luppoda idinto a nagserbi a look-out dagiti dadduma a kumplotda. Ti lalaki a suspek ti nagpammarang a kustomer a nangiyaw-awan iti imatang dagiti aglaklako tapno dida masiputan dagiti nagipuslit iti tagilako.

Addan iti kustodia ti polis ditoy ti CCTV footage para iti posible a pannakatakuat ti kinasiasino dagiti nagtakaw.#