Footer

BANNER: PNP: 4,231 tattao naaresto gapu iti panagsalungasingda iti gun ban

Uppat a ribu, dua gasut, tallupulo ket maysa a tattao ti naaresto gapu iti panagsalungasing iti gun ban nga impakat ti Commission on Elections manipud idi Enero 10 daytoy a tawen, daytoy ti kaudian a report manipud iti Philippine National Police.

 

Kinuna ti PNP nga iti kadagupan a 4,049 a naaresto, 33 ti police officers, 18 ti military personnel ken 2 a firemen, 35 nga opisial ti gobierno, 51 a security guards, 8 a miembro ti sabali pay a law enforcement agencies, 3 miembro ti militia, 22 a miembro a naitudo a threat groups ken 10 a miembro ti pribado nga armado a grupo.

 

Nakakumpiska met ti kapolisan iti 1,141 pistols; 1,027 revolvers; 154 rifles; 153 shotguns ken 809 improvised guns malaksid laeng dagiti nakumpiska kadagiti tsekpoint a pakaibilangan ti 157 gun replicas; 1,167 bladed weapons; 281 grenades; 313 explosives ken 37,428 rounds ti assorted ammunition.

 

Segun iti PNP, agtuloy a maipakat ti checkpoint operations kas panangipatungpal iti gun ban agingga iti Hunio 8.

 

Kabayatanna, impakaammo ti Police Regional Office 1 a “relatively peaceful” ti kalkalpas a nasional ken lokal nga  eleksion iti Region 1.

 

Segun ken ni PRO1 Director Chief Supt. Ericson T. Velasquez, awan ti nairekord a bayolente nga insidente sakbay, bayat ken kalpasan ti 2016 national and local elections.

 

 

Kinuna ni Velasquez a produkto ti “Whole–of-Government Approach” ken commitment dagiti amin nga ahensia ti gobierno ken stakeholders a natalna ken naurnos ti eleksion.

 

Innayon ni Velasquez a natalna ti pannakaisayangkat ti eleksion maigapu iti serye a contingency planning dagiti amin a miembro ti Regional  Regional Joint Security Control Center (RJSCC), umisu a deployment dagiti police personnel kadagiti sentro ti pagbutosan ken quick reaction teams (QRT), napingpinget a pannakaiwayat dagiti operasion ti kapolisan ken pannakadesignar ti red team a mangkita ken mangimaton iti implementasion ti plano ti seguridad iti amin a distrito politikal iti uppat a probinsia iti rehion.

 

“Babaen dagitoy maipagpannakkel a gapuanan, kayatko nga iyebkas ti panagyamanko kadagiti amin a PNP personnel a naideploy kadagiti sentro ti pagbutosan,” kinuna ni Velasquez idinto nga innayonna a maited dagiti gunggona ken komendasion kadagiti amin a rumbeng a mapadayawan.

 

Maipalagip a manipud pay idi Mayo 2, 2016, naideploy ti kapolisan kadagiti naituding a pakaipuestuanda ket saanda a pinanawan ti puestoda agingga iti pannakapasubli dagiti vote counting machines (VCM) ken dadduma nga election paraphernalia iti bukodda a lugar ti responsibilidadda.

 

Nangiwayat pay ti kapolisan ti Region 1 iti kampania ti panagdalus ken pannakaikkat dagiti campaign posters idi Mayo 12 babaen iti koordinasion ti lokal a gobierno kas paset dagiti aktibidad kalpasan ti eleksion ken Oplan Balik Eskwela.#