Footer

Ti Maika-48 a Kombension Dagiti Mannurat nga Ilokano

Ti Maika-48 a Kombension Dagiti Mannurat nga Ilokano

Sinursuran:  Kolum ni Jobert M. Pacnis

(Umuna a paset)

 

NAGADUN a delegado!

 

Masaom met siguro dayta no immayka iti maika-48 a kombension ti GUMIL Filipinas (Gunglo dagiti Mannurat nga Ilokano iti Filipinas ken iti ballasiw-taaw) wenno GF a naangay ‘diay Eco-Tourism & Sports Complex ti San Gregorio, Luna, Apayao itay Abril 22-24.

 

Wen, mapan a 375 a delegado dagiti opisial a nagrehistro iti nasao a kombension iti baet ti kinapanawen pay ti kampania ta eleksion la ngarud itay Mayo 9. Di nairaman ditoy dagiti immay laeng immammingaw iti maysa nga aldaw sa met laeng pimmanaw kalpasan a nakainniliwna dagiti pagtamdanna wenno padana a mannurat.

 

Iti naunday metten a panawen a panagat-atendarko iti kombension tunggal bulan ti Abril, a naideklara pay a Bulan ti Literatura Ilokana, kadayta laeng  a naimatangak ti kasta kaadu ti delegado. Wen, agarup 200 agingga iti 250 nga indibidual laeng ti tumabtabuno iti tinawen a kombension. Basbassit pay no mairana a panawen ti eleksion ta addada dagiti mannurat nga agtaray iti nadumaduma a posision wenno makumikomda iti akem a dida matallikudan kadagita kakasta nga okasion.

 

 

Iti met ketdi historia ti GF, dati a di bumabbababa iti 350 dagiti delegado. Ngem iti panaglabas ti panawen, a no sadino isu metten ti pannakasurotko ti desdes ti Literatura Ilokana, madlaw a ti ibabassit ti bilang dagiti agat-atendar.

 

Mabalin a ti umuna a rason ditoy, ti napasamak iti kallabes a di panagkikinnaawatan dagiti mannurat. Addada ngamin dagiti naglabas nga isyo a nanglilibeg iti organisasion ti GF. Ngem naglabas dagitoyen ket dagiti indibidual nga adda pannakaibiangna itoy, awandan kadagiti agdama a mangririenda iti organisasion. Igunamgunam ti agdama a presidente ti GF, Sir Arthur Urata, Sr., iti maikadua a panagtakemna, ti pannakaagas dagiti “sugat” iti kallabes. Makita itan ti bunga dayta a maysa nga arapaap ti administrasionna. Addadan dagiti simmina iti grupo nga in-inuten ti panagsublida. Ket agtultuloy latta daytoy a panagpasubli.

 

Maysa pay a rason ti irarasay dagiti agat-atendar ti pannakauma dagiti dadduma ta iti panagkunada, awan ti maad-adalda iti kombension. Isu la nga isu kano dagiti aglektiur, nalalaingda pay ngem kadagiti aglektiur, ken kurang dagiti maileklektiur.

 

Idi damdamok ti makigumil, tartaraudi ti ‘90s, aklonek a makuranganak met kadagiti maileklektiur. Kasla saan a maik-ikkan iti importansia dagiti agdadamo. Saan a mailektiur kadakuada dagiti do’s ken don’t’s iti panagsuratan. Wenno dagiti basic a rumbeng a masursuroda. Ad-adda a pangbeterano dagiti lektiur. Ken inniliw dagiti mannurat. Makitam ida kadagiti sirsirok ti kaykayo a di maputpot ti innistoriada a di mabalin nga awan ti pagsasanguanda a makaulaw.

 

Ngem saan a daytoy ti nangpungtil iti arapaapko a mangsurot iti dana dagiti id-idoluek a mannurat. Surat, basa, surat, basa ketdi ti inaramidko. Uray man ketdi no mamin-ano a marediek dagiti ipatpatulodko iti Bannawag. Ang umaayaw ay di nagwawagi, dayta ti pinangpatibkerko iti bagbagik.

 

Ket iti panaglabas dagiti tawen, nakaipablaakak met laeng. Saanakon a mannurot, kinunkunak iti nakemko. Mannuratakon!

 

(Adda tuloyna)