Footer

Agim-imon a lalaki, binagsolna ti kalib-inna

CANDON CITY – Imon ti nangiduron iti daytoy a lalaki a mangbagsol iti kalib-inna idi rabii ti Mayo 16.

Segun ken ni Bernardo Tamano Galaitez, 17, nariinganna ni Bernardo Tubain Galaitez, Jr. 47, tricycle driver, residente iti Barangay Darapidap, Candon City, ken ti inana a ni Maryjane Sabiano Tamano, 43, nga agsungsungbat idi agarup 11:20 ti rabii ti Mayo 16.

Nangeg pay ni Bernardo Tamano a kinuna ti inana iti suspek: “Ania aya ti pagim-imonam?”

Pinagtalna ni Bernardo dagiti dua ngem mapapati a nagtuloy latta ti panagsubangda.

Timmaray ni Maryjane ket nagpaarayat ngem kinamat ti suspek sana binagsol iti sumagmamano a daras a nagsagrapan ti biktima kadagiti sugat iti barukongna.

Segun met iti maysa a kaarruba nga immarayat, nadatnganda ti suspek a mangbagbagsol iti biktima iti inaladanda.

Inaresto dagiti nagresponde a polis ti suspek sada intaray ti biktima iti St. Martin de Porres Hospital, Candon City ngem indeklara ti doktor nga awanen ti biag daytoy.

Positibo ti suspek a nakainom idi binagsolna ti kalib-inna.

Addan ti suspek iti kustodia ti polis.#

Comments are closed.