Footer

EDITORIAL: Pannakaisubli ti Dusa a Patay

MALAPDAN ngata ti panagraira dagiti krimen ti pannakaisubli ti dusa a patay?             Daytoy ti nagkaykaysa a saludsod dagiti adu a Pilipino mainaig iti plano ni presumptive President-elect Rodrigo Duterte a mangipasubli ti death penalty para kadagiti nadagsen a basol kas ti panagnegosio ti illegal a droga, panagrames ti menor de edad, kidnap-for-ransom, murder wenno pammapatay ken dadduma pay a nadagsen a krimen.

Ti kari ni Duterte idi panawen ti kampania a mangparmek kadagiti krimen ken mangisubli ti urnos ken talna iti las-ud ti tallo agingga iti innem a bulan, ti nakaallukoy kadagiti adu a botante a nangitandudo kenkuana kabayatan ti kalkalpas nga eleksion. Desperadon dagiti adu nga umili iti agtultuloy a pannakalabsing dagiti linteg. Inaldaw dagiti mapaspasamak a nadagsen a krimen ngem nalag-an ti pannakaipakagat ti ngipen ti linteg gapu iti bulok a sistema ti hustisia iti pagilian ken panagliway wenno pannakikumplot kadagiti kriminal dagiti agserserbi iti gobierno.

Saan laeng a dagiti pribado ken kadawyan a tattao dagiti aglablabsing kadagiti linteg wenno agar-aramid kadagiti nadagsen a krimen. Iti naglabas, addan dagiti kongresista ken mayor a nasentensiaan gapu ti panagrames, illegal a droga, pammapatay ken dadduma pay a krimen. Adun dagiti nasentensiaan gapu kadagiti nadagsen a basol kas ti malversation of public funds, graft and corruption ken plunder. Ni sigud a Presidente ken agdama a Manila Mayor Joseph Estrada ket nabalud iti kaso a plunder ngem inikkan iti presidential pardon ni Pres. Gloria Macapagal Arroyo nga ita ket naka-house arrest gapu iti met laeng a kaso a plunder.

Saan nga agraira dagiti krimen no dagiti agar-aramid, mangipatpatungpal ken mangipakpakat ti linteg ket napudnoda kadagiti sinapataanda nga akem. Saan nga agraira ti illegal a droga no nainget ti linteg nga aramiden ti Kongreso, ipatungpal daytoy dagiti pulis ken dagiti natudingan nga ahensia, ket ipakagat daytoy ti piskalia ken husgado, ket no masentensiaan ti nagbasol, nasken nga ikaro ti inaramidna a krimen.

Maysa a pammaneknek ti kinalukay ti hustisia iti pagilian ket ti pannakaitultuloy dagiti illegal nga aramid dagiti sentensiado a kriminal sadiay New Bilibid Prisons. Iti naglabas, naipadpadamag nga adu kadagiti nakabalud gapu iti panagnegosio iti illegal a droga ti nangitultuloy kadagiti aramidda. Adu kadagitoy a balud ti agbibiag a nabaknang gapu ti impluensiada kadagiti kurap nga agserserbi iti gobierno.

Panggep ti sumaruno nga administrasion nga isubli ti dusa a patay tapno malapdan ti pannakapasamak dagiti adu a krimen a nagsaknap iti pagilian ta namnamaen ni Duterte a ti death penalty ket gubuayenna ti buteng kadagiti tattao nga agaramid ti nadagsen a krimen gapu ti kaibatoganna a dusa. Plano pay ni Duterte a tapno dagiti matiliw ken mabalud a big-time drug lord ket saandanton a pulos a makapagnegosio ti illegal a droga ket nasken a masentesiaanda iti dusa a patay a maipakat iti kabiitan a panawen. Ngem maipadaras ngata daytoy no nagadu dagiti legal a remedio a mangpabayag ti proseso wenno panagtulid ti hustisia?

Manamnama a daytoy nga addang ti sumaruno nga administrasion ket supiaten dagiti pro-life advocates nangruna ti Simbaan Katolika ta gapu iti kinasagrado ti biag, ken ti Dios laeng ti addaan karbengan a mangikeddeng ti dusa iti nagbasol a tao.

No maiduron sadiay Kongreso ti gakat nga agbalin a linteg ti pannakaisubli ti dusa a patay ket supiaten dagiti pro-life a kongresista ken senador. Agbalinto manen a nainget ti risiris dagiti pabor ken kontra iti pannakaisubli ti dusa a patay a mamagsisina kadagiti umili.

Panunoten koma a nasayaat ti sumaruno nga administrasion a saan a ti dusa a patay ti kangrunaan a manglapped ti krimen ta napaneknekanen daytoy kadagiti dadduma a pagilian a nangibasuran iti daytoy a dusa. Nasken laeng ti panagakem a napudno dagiti agipakpakat ken agipatpatungpal ti linteg.#