Footer

Ilocos Sur: Baluarte latta dagiti Singson

ILOCOS SUR – Napatalgedan manen iti kalkalpas nga eleksion a baluarte latta dagiti Singson ti Ilocos Sur ket awan pay ti masaripatpatan iti asideg a masakbayan a makabael a mangibalat kadakuada.

Kinapudnona, sakbay pay la ti panagkakampania, nalpasen ti eleksion iti probinsia iti sumagmamano a puesto kas iti kinagobernador ken bise gobernador.

Immun-una ngem daytoy, nasipsiputan no agipila manen dagiti kasupadi iti politika dagiti Singson ngem awan ti nagparang iti opisina ti Commission on Elections iti probinsia a mangsango ken ni agdama a Gobernador Ryan Luis Singson a nagpailayon iti puestona. ken ni dati a Governor Luis “Chavit” Singson a para bise gobernador.

Kellaat nga insanud ni Chavit Singson ti kandidaturana para bise gobernador ket insandina ni Bokal Jeremias Singson nga agpailayon koma a kameng ti hunta probinsial.

Iti daytoy nga estratehia ni Chavit Singson, nagbalin nga unopposed ni Bokal Jeremias Singson a para bise gobernador.

Iti dayta met la nga aldaw, impila ni Chavit Singson ti kandidaturana para konsehal iti Narvacan tapno “tumulong para iti panagprogreso daytoy nga ili”.

Idi nabilang dagiti butos iti nasional ken local nga eleksion idi Mayo 9, 2016, kas ninamnama, limsot ni Chavit a konsehal nupay maikapat laeng.

Nupay awan ti kinasango da Governor Ryan Singson ken ni Bokal Jeremias Singson para iti kinagobernador ken bise gobernador, adda nagtured a nangkarit iti kandidatura ni Vice Governor Deogracias Victor Savellano para iti kinadiputado iti umuna a distrito ti Ilocos Sur – ni Senior Board Member Christian Purisima.

Adu a kiday ti nagpangato iti daytoy nga inwayat ni Bokal Purisima agsipud ta iti nabayag a tiempo, uray idi nagbokal ti inana agingga iti naginana iti politika ken manipud idi simmublat a nagtakem a mayor iti ilina a San Ildefonso agingga iti nagbalin a bokal, sangsangkamaysa ti pamiliana ken dagiti Singson.

Kadagiti agpalpaliiw iti politika, maysa a political suicide ti panangsango ni Basi Purisima ken ni Savellano, agsipud ta arig kinaritna metten ti liderato dagiti Singson iti probinsia. Madakamat ditoy nga adda naamnut a nagkaduaan dagiti dua: nagtalinaed ni Savellano a napudno iti laklakay a Singson uray idi impeachment trial a nagtunged iti pannakapadisi ni Presidente Joseph Estrada iti puestona.

Kadagiti political analysts,  ad-adda pay a napabileg ti  patapat ti pamilia-Singson ken pamilia-Savellano iti panangasawa ni Governor Ryan Singson ken ni Patricia nga anak ti bise gobernador.

Kalpasan ti pannakabilang dagiti butos, arig dinalapus ti allawig ni Purisima.

Kas ninamnama, nagpayagpag ni Mika Singson-Mendoza nupay daytoy ti damona nga itatapog iti politika ket isu ti nakagun-od iti kangatuan a butos para bokal iti umuna a distrito.

Kasta met laeng ti senario iti maikadua a distrito. Nupay adda kinasango ni incumbent Congressman Eric Singson, no boksing koma ket arig di pay nagling-et a nangdaleb iti kinabalubalna.

Kangatuan met iti butos kadagiti para bokal iti maikadua a distrito ti probinsia ni incumbent SPM Jaime Singson.

Uray iti dua a siudad ti probinsia, dominante latta dagiti Singson.

Iti Vigan City, saanen a nagkandidato pay ni Mayor Eva Marie Singson-Medina ta maungpotnan ti maikatlo a terminona. Ngem kas ninamnama dagiti lumugar ditoy siudad, ni Konsehal Juan Carlo Singson-Medina nga anakna ti naitandudo a kandidato a para mayor.

Maibilangen nga awan ti napigsa nga oposision iti Siudad ti Vigan ta kimmapponda aminen iti partido ni Mayor Eva ket saan a nakakaskasdaaw nga awan ti nakaitured a simmango ken ni Konsehal Juan Carlo Medina.

Kabayatanna, kangatuan iti butos para konsehal ditoy met laeng a siudad ti sabali pay nga anak da Medina a ni Janina Medina-Fariñas. Agsubli a konsehal ni Janina kalpasan ti pannakiasawana iti pamilia Fariñas iti Ilocos Norte.

Nailayon met a konsehal iti siudad ti sabali pay a Singson, ni John Patrick Singson, anak ni Vice Governor-elect Jerry Singson.

Iti Candon City, nailayon iti sabali manen a termino ni Mayor Dr. Ericson Singson, anak ni incumbent Congressman Eric Singson. Unopposed ti katiketna a ni Vice Mayor Alfonso Singson, kabsat ni Congressman Eric.

Nabutosan pay a konsehal ti siudad ni Kristelle Singson-Martinez, anak ni Leonilo Singson, Jr a kabsat ni Cong. Eric.

Iti ili a Caoayan, unopposed ni Paolo Ancheta, anak ni Mayor Germie Singson-Goulart a saanen a nangituloy iti kandidaturana nupay adda pay maysa a terminona.

Kabayatanna, iti ili a Narvacan, nailayon ni Mayor Zuriel Zaragoza, ken nabutosan a bise mayor ni Fayinah Zaragoza, anak da Administrador ti National Tobacco Administration Edgardo Zaragoza ken ni Charito Singson-Zaragoza.

Nupay makuna a nalamiis ti langenlangen iti nagbaetan dagiti Singson iti umuna a distrito ti Ilocos Sur ken dagiti Zaragoza, agtartaray ti dara ti Singson iti urat da Mayor Zuriel ken Vice Mayor Fayinah, agsipud ta inada ni Charito Singson-Zaragoza, kabsat a babai ni Congressman Eric. (Salvador A. Espejo)

Comments are closed.