Footer

Naglibas ni Kirat!

Sarita ni Salvador A. Espejo

(Maikadua a paset)

 

Immawagak iti police station. Naammuak ken ni Police Supt. Jojo Del Pinto, ti hepemi, a nangibaonen iti dua a polis nga agsiput iti barangay ni Kirat. Agpadakami iti suspetsami ken ni Hepe a naammuanen ni Kirat nga adda nangkabit ken ni baketna.

Kinitak ti oras. Alas dose. Inyawisko ti panangaldawmi ken Fred. Imparadana ti mobile car iti sango ti Espressjo Cafe iti ballasiw ti Vigan City Convention Center. Simrekkami. Sumagmamano a kustomer ti nadatnganmi a mangmangan. Nagorderkami iti pangngaldaw.

Ngem dikami pay nakaisubo iti namitlo idi makangegkami iti sirena nga aggapu iti amianan. Aggilapgilap ti nalabaga a silaw ti police car a limmabas. Rimmuarak. Agwengwengweng ti transmitter ti mobile car.

“Proceed to Barangay Nagsangalan immediately. It seems Kirat has struck again. This time, he has killed a woman!”

Saanmin nga intuloy ti nangaldaw. Inayabak ti serbidora sako binayadan ti ordermi.  Madamdama pay, un-unorenmin ti Barangay Pagpandayan. Nagpakannawankami iti Barangay Pagpartian sakam nagpadaya a nangtarengteng iti Barangay San Jose.

Imparada ni Fred ti lugan iti likudan ti maysa a police car. Panakkelen ti dua kadsaaran a balay. Nalawa ti paraangan a linakub ti konkreto nga alad. Adayo iti kaarruba.

Immunegkami. Sinabatnakami ti maysa a polis. Nagtalimudok ti panagkitak iti bangkay a naidalutaytay iti arsadanan ti agdan.    Mangrugin nga agbalay ti dara a nangsellep ti nakusnaw nga asul a blusana.

“Ginarawyo ti bangkay?” inamadko iti polis.

“Saan, tsip.”

“Nangayabkayon iti retratista?”

“Addan iti dalan, tsip.”

Kinitak ti lalaki a nakatugaw iti sopa a nakadumog idinto a saklotna ti imana. Naammuak nga isu ti asawa ti napaltogan. Mario Corpuz ti naganna. Nabaneg. Adda pamuyaanna. Agtawen iti tallopulo. Kahero ti maysa a nalatak a kompania iti siudad.

Inruarko ti kuadernok ket inkur-itko ti insalaysay ni Mario Corpuz. Kaaw-awidna manipud iti opisina.  Nadatngannan a nakadasay ni baketna iti arsadanan ti agdan. Kellaat, adda nangpalek kenkuana. Sakbay a napukawna ti puotna, nadarimusmosanna ti likudan ti natayag ken napugot a lalaki a nagtaray a nangilukat iti ridaw sa rimmuar iti inaladan. Adda iggemna a kuarentay singko.

“Ania nga oras itay sumangpetka?” inamadko.

“Alas dose dies, Inspector.”

“Idi sumangpetka, nakalukat ti ridaw?”

“Nakarikep.”

“Siguradoka?”

“Wen. Inusarko ti bukodko a tulbek a simrek iti balay.”

Nataldiapak ti nabuong a sarming ti tawa iti abay ti ridaw. Inamirisko. Naiwarsi dagiti buong a sarming iti akinruar a paladpad ti tawa ken iti sementado a dalan nga agtunged iti kalsada.

“Kaano a nadlawmo a nabuong ti sarming ti tawa, Mr. Corpuz? sinaludsodko.

“Itay laeng, Inspector. It’s obvious, saan kadi? Binurak ti kriminal ti sarming tapno magaw-atna ti lettatan ti ridaw sa immuneg iti balay. Nangeg  ni baket ti nabuong a sarming ket immulog. Nagikkis la ketdi idi makitana ti kriminal. Nataranta ti kriminal ket pinaltoganna ni baket.”

“Adda kadi natakaw iti balayyo?”

“Mapukpukaw diay bag ni baket. Kasangsangpetna la ketdi ta di pay nakasukat idi napaltogan. Agisursuro dita NES.”

“Adda kadi seguro ni baketmo?” kasla awan aniamanna a sinaludsodko. “Routine question, Mr. Corpuz, dika koma gumura. I want to know all the details.”

“Nakaseguro ni baketko iti One hundred thousand.”

“Kaano a nangrugi?”

“Tallo a bulanen.”

“Sika ti benepisario iti seguro ni baketmo?”

“Kinapudnona,  agpadakami a nangala iti seguromi. One hundred thousand met ti innalak. Ni baketko ti benepisiary idinto a siak met ti benepisario diay segurona. Are you satisfied, Inspector?” kinuna ni Mario Corpuz.

Nagtung-edak.

Nasurok limapulo metros ti kaadayo ti balay ti kaasitgan a kaarruba ni Mario Corpuz iti amianan.  Andres Cosilan ti  bumalay. Agtawen iti 52, karpintero.

Ngem kinuna ni Mang Andres nga awan ti nangegna a kanalbuong. Kasta met nga awan ti nangegna a banurbor a limmabas iti sango ti balayda idi pasado alas dose.

“Kasano nga adda mangegna ket nagpigsa met ti volume ti radiona,” nakuna ni Fred  bayat ti ipapanmi iti sabali pay a kaarruba ni Mario Corpuz.

Melisa ti nagan bumalay, agtawen iti 45. Agtagtagibalay.

Adda nangegna a kanalbuong idi agarup alas dose kinse. Idi kano damo, kunana no naggapu iti buybuyaenna a daan a pelikula ni Fernando Poe, Jr.

Kalpasan ti sumagmamano a minutos, adda nangegna a banurbor ti motorsiklo a nagpaamianan.

“Nailasinyo no ania a klase a motorsiklo ti nagbanurbor a nagpaamianan?” sinaludsodko.

Nagwingiwing ni Melisa.

Kinitak ti oras iti pungupunguak. Ala una y median ti malem. Inseniasko ken ni Fred ti panagsublimi iti police station.

“Any lead ken ni Kirat?” sinaludsodko ken ni PO1 Gagarin a desk officer.

“Maysa nga agtutubo ti nagreklamo a natakaw ti motorsiklona itay agarup alas dose y media, sir. Tallo ti nakasaksi. Awan duadua a ni Kirat ti akin-aramid,”  kinuna ni Gagarin.

(Maituloyto)