Footer

Nagpammarang a piansadora, nanabtuog iti entrapment operation

MAGSINGAL, Ilocos Sur – Awan ti agbilang a di agpullo.

Nagpullo ti maysa a babai a nagpammarang nga agpipiansa dagiti adda kasona iti korte kalpasan a nanabtuog iti entrapment operation nga inwayat ti kapolisan maikontra kenkuana sadiay Barangay Bungro ditoy nga ili idi malem ti Mayo 14.

Iti kaudian a report, napaneknekan nga adda probable cause a nagsalungasing ni Loida Domingo Villa, 38, awanan asawa, ken residente iti Sitio Cayapa, Barangay Maas-asin, Magsingal, Ilocos Sur, iti Article 3161(a) ti Revised Penal Code wenno Estafa ket naipila ti kaso iti korte ti Cabugao babaen ti Criminal Case No. 3429-KS.

Naiwayat ti entrapment operation maikontra ken ni Villa kalpasan a nagpulong iti polis ti maysa nga abogado ti Public Attorney’s Office ken ni Warlito Castro y Asuncion, 35, ken residente iti Sitio Cayapa, Barangay Maas-asin, Magsingal mainaig iti mapapati a panangballaibo ni Villa iti biktima tapno mapadaras a marisut ti kaso a sangsanguenna iti korte.

Idi agarup 1:30 ti malem ti Mayo 14,  dimmawat ni Villa iti P3,000.00 manipud ken ni Castro a mapapati a maited iti abogado ti biktima ket iti dayta met laeng a malem, inwayat ti kapolisan ditoy iti panangidaulo ni Police Inspector Arcadio Vitamog ti entrapment operation  a nagtungpal iti pannakatiliw ti suspek.

Nakumpiska iti ikut ti suspek ti P3,000.00 a marked money a naaramat iti pannakapalab-og ni Villa.

Naammuan ken ni Castro a nangrugi ti panangballaibo kenkuana ni Villa idi Pebrero 22, 2015 idi naibalud iti police station ti Magsingal mainaig iti maysa a kasona a homisidio.

Mapapati nga impresentar ni Villa ti bagina a piansador ket dimmawat iti P20,000.00 manipud ken ni Castro tapno mapadaras ti pannakawayawayana ken P30,000.00 para iti abogadona para iti nadaras a pannakadismis ti kasona.

Idi Pebrero 29, dimmawat ni Villa iti P2,000 ken ni Castro a maited kano iti abogadona.

Dimmawat manen ti suspek iti tig-P2,000.00 idi bista ti biktima idi Abril 7 ken 11.

Kinuna ni Castro nga idi Abril 19, timmawag ni Villa kenkuana babaen iti selpon ket dimmawat iti P10,000.00 a maited iti abogadona.

Nagsuspetsa ni Castro ket binirokna ti ibagbaga ni Villa nga abogadona. Ditoy a natakuatanna nga awan ti nait-ited iti abogado a kuarta.

Idi dimmawat manen ti suspek iti P3,000.00 idi agarup 1:30 ti malem ti Mayo 14, inwayaten ti kapolisan ti Magsingal ti entrapment operation a nagresulta iti pannakatiliw ti suspek.#