Footer

Pimmaltog iti tricycle driver, nabigbig babaen iti retrato

VIGAN CITY – Nabigbigen ti lalaki a nangpaltog iti maysa a tricycle driver  sadiay Barangay V ditoy a siudad idi malem ti Mayo 16.

Babaen iti retrato, positibo a binigbig ni Moises Adriano Cardenas Jr., 25, baro, tricycle driver ken residente iti Barangay Ayusan Sur  ti suspek a maysa a Jeffminaro Almario Reyes, 35, naasawaan, natibo iti Cavite ngem agdama nga aggigian iti Paa Street, Barangay San Julian Sur ditoy siudad.

Segun iti report, pinaltogan ni Reyes ti biktima a ni Cardenas gapu iti mapapati a di panangpabus-oy ti biktima iti suspek a manglabas kenkuana bayat ti panagdaliasat ti luganda iti Liberation Boulevard, Barangay V, ditoy siudad idi agarup 5:05 ti malem ti Mayo 16.

Kas maibatay iti panagimbestiga dagiti polis, agpalaud a direksion ti biktima a nakalugan iti traysikelna a Honda TMX 155 idinto a sarsarunuen ti Yamaha Mio Sporty a minaneho ti suspek ngem saan a pinabus-oyan ni Cardenas ni Reyes a mang-obertek kenkuana a puon ti nakarurodan ti suspek.

Mapapati nga idi naikkan iti gundaway, inobertekan ti suspek ti lugan ti biktima sa nagsardeng iti masanguanan ti traysikel a puon ti nakadungparan ti kutit ti motorsiklo ti suspek.

Inasut ti Reyes ti paltogna sana pinaputokan iti naminsan ni Cardenas a nakapuntaan ti dakulap ti biktima a simmalput iti kilikilina.

Naitaray ti biktima iti Metro Vigan Cooperative Hospital para iti pannakaagasna idinto a naglibas ti suspek.

Iti kaudian a report, naideklara a nalasatanen ti biktima ti peggad ti biagna.

Maisagsagana metten ti kaso maikontra iti suspek nupay negatibo ti inwayat ti kapolisan a pursuit operation.#