Footer

Ti Maika-48 a Kombension Dagiti Mannurat nga Ilokano

Sinursuran:  Kolum ni Jobert M. Pacnis

(Maikadua a paset)

 

Ketdi, saan a nabaliwan ti tayok ti isbok. Intuloyko ti nagadal nga agsurat. Mamatiak la unay nga awan ti ngudo ti panagadal iti daytoy a tay-ak.

Kadagitoy a maawatakon no apay a kasta ti kombension. Nalabit, tapno agbalin a pakamulian ni agngayangay a mannurat ti itatabunona iti panagsasarak dagiti mannurat. Masapul nga ikalukagna no kasano a makaadal idinto nga awan mangisuro kenkuana kadagiti basic a namnamaenna.

Wen, a, ta no tinawen lattan a basic ti maileklektiur, di pay ket kasla awanen ti dinur-asan, dur-asan ti kurditan Samtoy? Isu a masapul met a tinawen nga agdur-as dagiti lektiur/mailektiur no kayat a maragpat ti panagdur-as ti lengguahe nga Ilokano.

Ken maysa, di talaga mapnek iti mailektiur iti naituding nga aldaw ti kombension ta mano laeng nga oras dayta nailatang a panaglektiur iti maysa a suheto? Ket no kitaen a naimbag, ti panagsurat ad-adalenda iti akademia iti no mano a semester. Ay, makunam a talaga a kurang ti it-itedda iti kombension no kasta.

Ngem saan lattan, kas panagkitak, panangadalko, a nagkurang ti GF iti akemna a mangmuli kadagiti agngayangay a mannurat. Dakkel unay nga addang ti panangirusuatna iti Pasnaan a pakamulian dagiti agdadamo a mannurat.

Iti Pasnaan, mapili dagiti fellow iti sarita, sarita a para ubbing, daniw, daniw a para ubbing, sarilaysay/salaysay, daniw a pangorona ken dadduma pay.  Tunggal aggandat a maki-Pasnaan, adda piesa nga isubmitarna. No mapagasatan a mapili, maysa a maawagan iti naituyang nga aldaw. Ditoy a maworksiap ti indatagna a piesa kaduana dagiti sabsabali pay a napili. Rangrangkayen dagiti bangolan a mannurat dagiti sinurat. Maibaga, maitudo dagiti pagkapsutan ken pagpigsaan ti sinurat. Saan a mabalin ti narabaw ti kimmotna ditoy ta baka no agluasit, agugaog pay ketdi, no kastan a “malais” (iti panagkitana) ti sinuratna.

Makunak nga epektibo daytoy a gannuat ti GF kas pangsupusopna iti pagkurkuranganna kadagiti agdadamo tunggal kombension iti bulan ti Abril. Adun kadagiti fellow ti mabasbasa ita ti gapuananna iti Bannawag ken mangyal-alatdan kadagiti nadumaduma a pasalip. Aginnemen a tawen daytoy a proyekto ket no agtultuloy la ketdi, makuna nga addanto latta Ilokano a lumtuad a mangipateg iti nakayanakanna a lengguahe.

Itay kallabes a Dap-ayan wenno kombension, impakita manen dagiti mannurat kada mannurot ti di magatadan a panagiinniliwda. Naidasar dagiti nadumaduma a topiko iti lektiur kas koma no kasano ti agsurat iti sarita a para ubbing ken no kasano nga ilibro dagitoy a makaay-ayo kadakuada; no kasano ti agsurat iti komiks; photography ken dadduma pay.

Nayalnag pay dagiti walo a baro a libro a gameng manen iti agamang ti Literatura Ilokana. Daksanggasat laeng, ka-Sinursuran, ta saan a nakakamakam ‘diay bukodtayo a libro a nasaok idin ditoy kolumtayo gapu kadagiti di napakpakadaan a parikut iti panagimaldit. Nupay kasta, mangnamnamaak a rummuarto met laeng daytoy a libro.

Pagyamanak ketdi ta nairamanak kadagiti dua a rimmuar a libro (Tagnawa series ti daniw ni ayat ken sarita). Ket no kayatmo ti maaddaan iti kopia kadagitoy a libro, kontakennak laeng iti facebook, selpon wenno email (damagen laeng ken ni apo publisher ti TNM).

Naitampok met dagiti mannurat a nangyalat kadagiti nadumaduma a pasalip. Maysa a pasalip iti sarita (open category) iti ALVIYA, salip iti sarita a para agdadamo (AMMAFLA) ken salip iti daniw (open category) iti Saniata Prize. Ket napagasatantayo met a maikadua a gunggona iti ALVIYA idinto a maikatlo a gunggona ni ‘Tanud Danilo B. Antalan a kadua nga agsursurat ditoy TNM.

(Adda tuloyna)

Comments are closed.